Mest lesnu innlendu viðskiptafréttir ársins 2012

Vísir var með fjölbreytta umfjöllun um viðskipti á árinu. Þetta voru jafn ólíkar fréttir og þær voru margar. Sumar hverjar í léttum dúr, eins og frétt af fyrirhugaðri opnun H&M og líka grafalvarlegar fréttir af nauðasamningum gömlu bankanna, en ekki sér enn fyrir endann á því ferli.

1. Boða opnun H&M á Íslandi

Mesta athygli vakti furðufrétt í lok janúar um að búið væri að hengja auglýsingar á glugga að Laugarvegi, þar sem Verslunin 17 var áður til húsa. Á borðanum stóð að H&M myndi opna í húsinu. Síðar kom í ljós að það voru alls ekki neinir verslunarmenn sem hengdu borðann upp heldur voru það listnemar sem voru þarna á ferð með gjörning í tengslum við nám sitt.

2. Birgitta Haukdal í stjórn Leirlæks

Önnur mest lesna fréttin var af Birgittu Haukdal söngkonu, sem er í varastjórn félagsins Leirlæks. Leirlækur var stofnað af P126 einkahlutafélagi Benedikts Einarssonar, eiginmanns hennar.Tilgangur félagsins Leirlæks er eignaumsýsla hvers konar, þar með talin kaup, sala og leiga fasteigna og lóða.

3. Endurgreiðsla Seðlabankans er toppfrétt í Noregi

Þriðja vinsælasta fréttin er frétt frá því í mars, sem tengist fréttum af því að ríkissjóður og Seðlabankinn ákváðu að endurgreiða hluta af lánum sínum hjá Alþjóðagjaldeyrissjóðnum og Norðurlöndunum löngu fyrir gjalddaga þeirra. Þessi tíðindi vöktu mikla athygli í Noregi og Íslendingar lásu allt um áhuga Norðmanna á Vísi.

4. Dress Up Games malar gull

Fjórða vinsælasta frétt ársins var frétt av dúkkulísufyrirtækinu Dress Up Games ehf. Fyrirtæki hagnaðist um 88,3 milljónir króna á árinu 2010. Á árunum 2008 og 2009 nam hagnaður félagsins samtals um 213 milljónum króna. Það hagnaðist því um rúmlega 300 milljónir króna á þriggja ára tímabili, samkvæmt síðustu ársreikningum Dress Up Games ehf.

5. Þúsund ómenntaðir karmenn hverfa úr opinberum gögnum

Fimmta mest lesna fréttin var um það að um 1.000 ómenntaðir karlmenn á aldrinum 16 til 49 ára hefðu horfið úr opinberum tölum um vinnumarkaðinn. Þessi frétt birtist seint í janúarmánuði. Hvorki tölur frá Vinnumálastofnun né regluleg skýrsla Hagstofunnar um vinnumarkaðinn gátu skýrt hvernig um 1.000 karlmenn á þessum aldri hurfu úr gögnum beggja þessara stofnanna. Líkleg skýring var þó talin sú að þessi hópur hafi í einhverjum mæli leitað tækifæra erlendis, eða þá að margir þeirra hefðu verið það lengi á atvinnuleysisbótum að þeir ættu ekki rétt á þeim lengur.

6. Bjóða ódýrasta flugið – ef þú skilur farangurinn eftir

Í ágúst sögðum við síðan frá því að WOW air rukkaði sérstakt töskugjald af farþegum sínum. Það var því þannig að ef viðkomandi vildi fara farangurslaus til þessarar borga þá gætu þeir greitt tæplega tíu þúsund fyrir og fengið þannig lægsta fargjaldið hjá WOW. Ef þeir vildu hafa föt til skiptanna, kostaði miðinn 12.800 krónur aðra leið.

7. Eitt elsta kaffihús landsins til sölu – Finni vill tilbreytingu

Við sögðu svo líka frá því í ágúst að fjögur vinsæl kaffihús hefðu verið sett á sölu. "Þetta er bara spurning um tilbreytingu, ég vil breyta til og halda mér ferskum," sagði. Guðfinnur Sölvi Karlsson, eða Finni eins og hann er að jafnaði kallaður, sem átti staðina. Einn hinna vinsælu staða var Prikið, en hinir voru Frú Berglaug, Glaumbar, Gamli Gaukurinn, áður Gaukur á stöng, og svo hamborgarabíllinn Rokk.

8. Titringur vegna nauðasamninga – fundað með forsetanum

Við sögðum svo frá því í nóvember að skorað hefði verið á Ólaf Ragnar Grímsson, forseta Íslands, að beita sér gegn því að nauðasamningar við kröfuhafa í þrotabú Kaupþings og Glitnis yrðu samþykktir. Hópur starfsmanna í fjármálageiranum óttast að útgreiðsla á hundruðum milljarða í erlendri mynt, geti grafið undan gjaldeyrisstöðu þjóðarbússins og valdið miklu efnahagstjóni og fór því á fund forsetans. Nauðasamningum hefur verið fresta um óákveðinn tíma.

9. Mynd af sigurvegaranum á turninum í New York

Níunda vinsælasta frétt ársins er svo af því að Bjarni Kolbeinsson, viðskiptafræðinemi við Háskóla Íslands, hefði fengið afhent verðlaun fyrir að ná bestri ávöxtun í Ávöxtunarleik Keldunnar og Vísis í október, en hann fékk nýjan i pad að launum frá epli.is. Af því tilefni birtist mynd af Bjarna á turninum svokallaða í New York, þar sem helstu tíðindi af markaði Nasdaq birtast.

10. Blóðbað á markaði – íbúðabréf falla um 14 prósent

Tíunda mest lesna viðskiptafréttin á árinu tengdist ákvörðun Alþingis um að herða gjaldeyrishöft. Vísir greindi nefnilega frá því að lagasetningin um hert gjaldeyrishöft á Alþingi hefði kallað fram mikil viðbrögð á skuldabréfamarkaði strax daginn eftir að þau voru sett. Þannig lækkuðu stutt íbúðabréf eða flokkurinn HFF14 um 14% í verði strax eftir opnun markaða og HFF24 lækkuðu um 2,5%. Þessar lækkanir smituðu síðan út frá sér yfir í ríkisskuldabréf.