Jón Arnór með fimmtán stig í flottum sigri

Jón Arnór Stefánsson átti góðan leik með CAI Zaragoza þegar liðið vann 23 stiga heimasigur á FIATC Mutua Joventut, 96-73, í spænsku úrvalsdeildinni í körfubolta í dag. CAI Zaragoza er í áttunda sæti deildarinnar eftir þennan sigur sem var sá þriðji hjá liðinu í síðustu fjórum leikjum.

Jón Arnór var með 15 stig, 4 stoðsendingar og 2 fráköst á 33 mínútu í leiknum en hann hitti úr 4 af 7 skotum sínum utan af velli og setti niður öll fimm vítin sín. Jón Arnór skoraði tvær þriggja stiga körfur úr þremur tlraunum.

Jón Arnór hefur brotið tíu stiga múrinn í síðustu þremur leikjum liðsins og alls sjö sinnum á tímabilinu en hann er að skora 8,4 stig að meðaltali í leik.