Jólakúlur úr mosa

Glys og glingur hefur nánast dottið út hjá mér og nú skreyti ég bara með náttúrulegu efni heima hjá mér um jólin,“ segir Auður Árnadóttir blómaskreytingameistari. Síðustu fjögur árin hefur hún leitað út í náttúruna eftir hráefni í skreytingar. Nú fær "jólaskrautið“ jafnvel að hanga allt árið. "Yfirleitt var ég orðin þreytt á jólaskrautinu eftir hátíðisdagana en nú get ég ég eiginlega ekki hugsað mér að taka jólin niður. Þetta er svo notalegt. Fólk heldur kannski að það sé ekki nógu jólalegt að vera með náttúruna svona inni í stofu, en það er ótrúlega hátíðlegt.“ Auður býr meðal annars til engla úr ull, kransa úr greinum og greni og litlar kúlur úr mosa, skófum og silfurkambi. Hún laumast þó til að setja smá glimmer á mosakúlurnar til að gera þær jólalegri en þær glimmerlausu lætur hún hanga allt árið. "Við þurfum að njóta náttúrunnar miklu betur. Ég er svo heppin að ég bý með hraunið allt í kringum mig hér í Garðabænum og hef lært að meta það,“ segir Auður en auk skreytinganna býr hún einnig til myndir úr náttúrulegum efnum. Þá hefur Auður, ásamt Ástu Bárðardóttur, sett upp Jólastofu að Kirkjulundi 19 við Vífilsstaði í Garðabæ, þar sem hægt er að nálgast skreytingar eftir hana. Þá er hún einnig á Facebook sem Auður í náttúru Íslands.