Marcus Walker ýtir heldur betur undir goðsögnina einu sinni KR-ingur, ávallt KR-ingur. Þessi frábæri bakvörður sem fór á kostum með KR-liðinu veturinn 2010 til 2011 stóð nefnilega við loforð sitt og fékk sér KR-húðflúr á öxlina.
Walker gaf það loforð á sínum tíma að hann myndi láta "merkja" sig KR til lífstíðar tækist KR-liðinu að vinna Íslandsmeistaratitilinn vorið 2011. KR vann síðan titilinn ekki síst fyrir framlag Walker sem var með 32,5 stig að meðaltali og 67 prósent þriggja stiga skotnýtingu í lokaúrslitunum á móti Stjörnunni.
Walker spilaði í Úkraínu síðasta vetur og á meðan ekkert fréttist af nýju húðflúri kappans héldu nú flestir að hann hefði guggnað á loforðinu sínu. Það var hinsvegar ekki rétt.
Walker birti stoltur mynd af nýja KR-húðflúri sínu á fésbókinni í dag og það er óhætt að segja að hjarta KR-inga hafi slegið aðeins örar við að sjá hollustu Walker við félagið.
Marcus Walker hefur nú yfirgefið úkraínsku deildina og mun spila með Sigma Barcellona í ítölsku b-deildinni í vetur. Nýja húðflúrið hans er risastórt á vinstri öxlinni og verður því ávallt vel sjáanlegt inn á körfuboltavellinum í framtíðinni.
Marcus Walker fékk sér KR-húðflúr á öxlina
