Vettel stjórnaði ferðinni í Barein

Sebastian Vettel var rétt í þessu að stýra Red Bull-bíl sínum til sigurs í Bareinkappakstrinum. Hann leiddi meginpart kappakstursins og var eldsnöggur allan tíman.

Kappaksturinn var æsispennandi og gríðarleg barátta átti sér stað á brautinni. Vettel var ofboðslega grimmur í fyrstu hringjum mótsins þegar hann barðist við þá Nico Rosberg og Fernando Alonso. Þeir skiptust á að leiða mótið í upphafi, þar til Vettel komst loks framúr Rosberg. Eftir það var leikurinn auðveldur fyrir heimsmeistarinn.

"Ég vissi að það var mikilvægt fyrir mig að komast sem fyrst í forystuna," sagði Vettel á verðlaunapallinum í viðtali við David Coulthard. Christian Horner, liðstjóri Red Bull, sagði svo í viðtali við Sky Sports eftir mótið að allar áhyggjur liðsins af dekkjaslitinu hefðu horfið þegar þeir sáu hversu vel Vettel fór með dekkin. "Það er eins og hann tengist þeim sérstaklega," sagði Horner.

Alonso þurfti strax eftir átta hringi eða svo að draga sig í hlé inn á viðgerðarsvæðið því afturvængurinn var bilaður og festist opinn eftir að hafa verið opnaður á beinu köflum brautarinnar. Hann lauk þó mótinu í áttunda sæti og fær tvö stig fyrir.

"Þetta var svekkjandi bilun því við höfðum hraðann og fyrir Massa að hafa tvö dekkjavandamál sem þurftu athygli strax," sagði Stefano Domenicali, liðstjóri Ferrari, eftir mótið. Massa lauk mótinu fimmtándi en furðulegar dekkjabilanir vöktu athygli áhorfenda. Hægra afturdekk eyðilagðist tvisvar þegar það leit út fyrir að rifna við minnsta álag.

Lotus-ökumennirnir tveir, þeir Kimi Raikkönen og Romain Grosjean, luku mótinu í öðru og þriðja sæti eftir að hafa átt furðulega helgi þar sem aldrei var víst hverjir möguleikar þeirra yrðu í mótinu. Framanaf leit ekki út fyrir að þeir myndu gera einhverja snilld en taflið snérist við um miðbik keppninnar. Síðustu hringir Lotus-manna voru svo frábærir.

"Þeir ættu frekar að kalla þig Herra Áreiðanlegan, frekar en Ísmanninn," sagði Coulthard við Raikkönen. Athygli vekur að sömu menn skipa efstu þrjú sætin í ár eins og í fyrra.

Paul di Resta, ökuþór Force India, var frábær í kappakstrinum eins og hann var í tímatökunum. Hann lauk mótinu í fjórða sæti eftir að hafa leitt mótið nokkra hringi. Lewis Hamilton á Mercedes endaði fimmti eftir að hafa látið lítið fyrir sér fara í mótinu. Rosberg varð níundi eftir að hafa upplifað mikið dekkjaslit.

Sergio Perez, sá sem tók við af Hamilton hjá McLaren, var ótrúlega grimmur í mótinu og endaði sjötti. Hann barðist harkalega við liðsfélaga sinn, Jenson Button, um miðbik keppninnar og keyrði meira að segja aftan á hann svo að hluti af framvæng McLaren-bílsins brotnaði. Button varð svo að sætta sig við tíunda sæti eftir að dekkjaslitið varð stjórnlaust.

Mark Webber, liðsfélagi Vettel hjá Red Bull, lauk mótinu í sjöunda sæti. Keppnin var ofboðslega jöfn og luku allir ökumenn minnst 55 hringjum af 57, nema Jean-Eric Vergne hjá Toro Rosso sem þurfti að hætta keppni eftir að Charles Pic ók á hann.

Eftir mótið hefur Vettel aukið forystu sína í stigakeppni ökuþóra og er nú með 77 stig. Raikönnen er annar með 67 stig og Hamilton þriðji með 50. Alonso er með 47 og Mark Webber með 32. Red Bull er því efst í stigakeppni bílasmiða með 109 stig gegn 93 stigum Lotus-liðsins. Ferrari er í þriðja sæti með 77 stig.

Næsta mót fer fram í Barcelona á Spáni eftir þrjár vikur, þann 12. maí. Þar vann Pastor Maldonado óvænt í fyrra fyrir Williams-liðið. Mótið markar líka upphaf tímabilsins í Evrópu þar sem bílarnir verða stöðugt uppfærðir tæknilega.