"Fljótlega eftir að Laugaskokk varð til fyrir níu árum fórum við að hlaupa eitt laugardagshlaupið í kringum Elliðavatn þegar nær dró jólum. Þar er sérstaklega fallegt að hlaupa á aðventunni, ég tala nú ekki um ef það hefur snjóað. Eftir hlaupið hittist allur hópurinn heima hjá mér yfir heitu kakói,“ segir Davíð Björnsson, hlaupagikkur með meiru, en hann er einn af upphafsmönnum hlaupahópsins Laugaskokks.
„Oft erum við að hlaupa í kringum 13 kílómetra þennan laugardag og yfirleitt er vel mætt í kakóhlaupið. Það er nefnilega oft erfiðara að drösla sér af stað út þegar orðið er svona dimmt og þá hjálpar til að eiga von á einhverju skemmtilegu í lok hlaups,“ segir Davíð.
Davíð hefur stundað útihlaup í mörg ár og segir engu máli skipta hvort hlaupadagar hitti á hátíðisdaga eða ekki. Það sé rútína sem skipti máli, hlaupin séu ekki tímabundið átak heldur lífsstíll.
„Það er bara regla að drífa sig út að hlaupa enda er það rútínan sem skilar manni mestu. Flestir í þessum hópi fara alltaf 3-4 sinnum út að hlaupa í viku, hvort sem það eru jól eða ekki. Hlauparar eru svolítið sérvitur hópur og mjög fastheldinn,“ segir Davíð sposkur.
En hvað er svona gott við að hlaupa? „Það eru eflaust til hundrað mismunandi svör við því. Það er svo gott að vera úti í hreina loftinu og hlaup eru líka hreyfing sem allir eiga auðvelt með að stunda. Þegar hægt er að hlaupa í eins fallegu umhverfi og við fáum í Elliðaárdal eða Laugardal, þá eru þetta forréttindi.“
15 lítrar af heitu súkkulaði
15 l mjólk
1.800 g Síríus Konsum súkkulaði
2 l rjómi, þeyttur
Hitið mjólk að suðu og bætið súkkulaðinu í bitum út í heita mjólkina.
Takið af hitanum og hrærið í þar til súkkulaðið hefur bráðnað saman við mjólkina.
Hellið súkkulaðinu í bolla og setjið þeyttan rjóma ofan á.
Uppskrift fengin af heimasíðu Nóa Síríusar og löguð að 15 lítrum.
