Karlmaður á fertugsaldri, sem var handtekinn í Leifsstöð í gær eftir að hann braut flösku með amfetamínbasa við tollskoðun, var úrskurðaður í tveggja vikna gæsluvarðhald í morgun. Alls þurftu sex starfsmenn flugvallarins á læknisaðstoð að halda eftir atvikið.
Maðurinn sem er Lithái á fertugsaldri og ekki búsettur hér á landi var leiddur inn í Héraðsdóm Reykjaness á tíunda tímanum í morgun, þar sem krafist var gæsluvarðhalds yfir honum.
Hann var handtekinn í Leifsstöð í gær eftir að tollverðir fundu flösku í farangri hans með vökva sem hann hélt fram að væri rauðvín. Í stað þess að afhenda tollvörðum flöskuna grýtti maðurinn henni í gólfið og samkvæmt heimildum fréttastofu virtist hann vel vita að hún innihéldi amfetamínbasa þar sem að hann kastaði henni þannig að ekki myndi skvettast á hann sjálfan.
Fjórir tollverðir og lögreglumaður sem voru á staðnum fundu fyrir ertingu í öndunarfærum og fleiri eitrunareinkennum. Voru þeir fluttir á Landspítalann þar sem basinn var hreinsaður af þeim í sérstakri eiturefnagátt áður en þeir fengu að fara inn á bráðadeild þar sem hlúð var að þeim. Þeir fengu allir að fara heim síðar um kvöldið og er heilsa þeirra í dag, samkvæmt upplýsingum fréttastofu, góð.
Annar lögreglumaður sem var á staðnum þegar atvikið átti sér stað leitaði svo á Heilbrigðisstofnun Suðurnesja í gærkvöldi vegna einkenna eiturefnamengunar, en fékk að fara heim að skoðun lokinni.
Dómari við Héraðsdóm Reykjaness féllst á gæsluvarðhaldskröfu Lögreglustjórans á Suðurnesjum í morgun á grundvelli rannsóknarhagsmuna og mun maðurinn sitja í varðhaldi til 13. nóvember. Lögmaður mannsins hefur kært úrskurðinn til Hæstaréttar.
Innlent
