Bílskúrinn: Hvað er að frétta frá Spáni?

Spænski kappaksturinn sem fram fór í gær var fyrir margt áhugaverður. Liðsfélagar glímdu og bílarnir rásuðu mikið um brautina. Mercedes mennirnir skiluðu fullu húsi stiga. Lewis Hamilton vann og Nico Rosberg varð annar.

Hvaða lið er næst á eftir Mercedes?

Hvernig var stemmingin hjá Ferrari?

Hvaða lið náði mestum framförum þegar komið var til Evrópu og af hverju skiptir máli í hvaða heimsálfu er keppt?

Allt þetta og fleira er skoðað í Bílskúrnum, léttu hliðinni á Formúlu 1 hér á Vísi.

Hvaða lið er næst best?



Mercedes liðið er með svo afgerandi forskot þessi misserin að það er enginn spurning hvaða bíll er bestur. Öllu áhugaverðara er að velta fyrir sér hvaða lið kemur á eftir Mercedes.



Ef horft er á stig í keppni bílasmiða er ljóst að Red Bull liðið er næst best með 84 stig. Ferrari er svo í þriðja sæti með 66 stig. Gefa stigin raunhæfa mynd?

Fyrir keppni helgarinnar var það ekki raunin en nú virðist sem Red Bull sé óðum að ná fyrri styrk og verðskuldi annað sæti í keppni bílasmiða. Afbragðs akstur Sebastian Vettel á Spáni undirstrikaði það en hann ræsti í 15. sæti og endaði í því 4.

Daniel Ricciardo hélt velli, hóf keppni í 3. sæti og endaði í 3. sæti. Ferrari var í öðru sæti áður en Formúlan kom aftur til Evrópu.

Stemmingin hjá Ferrari



Lið sem hefur sögulega ná bestum árangri í Formúlu 1. Lið sem allir vita að keppir í Formúlu 1. Lið sem nú hefur ekki unnið keppni í heilt ár eða síðan Fernando Alonso vann á Spáni í fyrra.

Kimi Raikkonen og Fernando Alonso voru uppteknir af því mest alla keppnina að berjast sín á milli. Það er almennt venjan hjá Formúluliðum að sá sem er framar á brautinni fær að koma fyrr inn á þjónustusvæðið.

Ferrari fór gegn þessari reglu tvisvar á Spáni. Raikkonen vildi meina að það hefði kostað sig 6. sætið sem Alonso náði af honum þegar 3 hringir voru eftir af keppninni. Alonso hafði miklu meira grip þökk sé betur útfærðri keppnisáætlun.

Raikkonen var ekki kátur með þessa tilhögun eftir keppnina og neitaði að svara spurningum blaðamanna.

Hvers vegna er mest rætt um framfarir núna?



Mikil umræða hefur verið að undanförnu um hvaða framfarir lið sjái fyrir sér að ná. Alltaf virðast liðin miða við Spán í því samhengi. Hver vegna?



Formúla 1 er upprunin í Evrópu og hefur síðan 1950 þegar fyrsta keppnin fór fram, dreift sér um allan heim. Liðin eru þó ennþá öll með sínar höfuðstöðvar í Evrópu.

Þess vegna er auðveldara fyrir liðin að koma viðbótum og uppfærslum á keppnisstað þegar keppnirnar færast nær heimahögunum.

Hvaða lið stóð upp úr á Spáni?



Fyrir utan Mercedes auðvitað. Líklega verður að eigna Lotus þann heiður. Þrátt fyrir erfiðleika Pastor Maldonado, átti Romain Grosjean mjög góða helgi og náði í fyrstu stig Lotus á tímabilinu. Hann endaði keppnina í 8. sæti.

Maldonado hins vegar hélt áfram að hneyksla, hann ók á Marcus Ericsson á Caterham í keppninni. Þá hafði hann þegar gerst sekur um ökumannsmistök á tímatöku sem skiluðu honum á beint á varnarvegg.

Maldonado er kominn með 4 refsipunkta á leyfið sitt en þegar ökumaður fær tólfta punktinn fer hann í keppnisbann eina keppni.

Á Nico Rosberg möguleika á að stöðva Hamilton?



Eftir keppnina sagði Hamilton „Nico var fljótari í dag, ég átti erfitt með að finna jafnvægið. Nico var yfir allt fljótari þessa helgi en sem betur fer náði ég að halda honum fyrir aftan mig.“

„Ég þurfti einn hring í viðbót til að ná honum, þá hefði ég virkilega látið á það reyna,“ sagði Rosberg eftir keppnina.

Rosberg er farinn að endurtaka í sífellu „ég þoli alls ekki að verða annar á eftir Lewis,“ þegar hann er spurður um hvað honum finnist um að lenda í öðru sæti.

Ljóst er að það stefnir í harðan slag þeirra á milli.