Væntingarnar
Við vissum að það væri á brattann að sækja vegna sterks meirihluta og lítils sjáanlegs ágreinings innan bæjarfélagsins. Hugsanlega eitthvað lítilræði sem útskýrði þessar fáu neikvæðu raddir sem maður heyrði stundum í. Flestar þjónustukannanir sýna jú fram á að allt sé svo gott. Margt er svo sannarlega gott í Garðabæ og sumt er meira að segja alveg frábært. Við fundum hinsvegar að raddir óánægðra íbúa sem héldu einhverju öðru fram urðu sífellt fleiri. Eftir því sem við kynntum okkur málin betur og ræddum náið við fleiri bæjarbúa var ljóst að ekki var allt eins og það sýndist.
Lærdómurinn
Það líður ekki öllum vel í Garðabæ. Sjálfsagður réttur fólks er ekki virtur, þjónusta við þá sem svo sannarlega þarnast hennar er í lágmarki og stundum alls ekki í boði. Við búum í bæ sem er fyrir suma, bæ sem líkist sérfélagi en ekki samfélagi. Rekstrarlega séð stendur bærinn mjög vel enda bæjarbúar að meðaltali mjög tekjuháir en greiða líka svo há þjónustugjöld að hagurinn af lága útsvarinu nýtist varla. Handahófskenndar ákvarðanir eru teknar í skipulagsmálum án samráðs við alla þá sem að borðinu eiga að sitja. Stundum er framkvæmt án þess að leita bestu kjara. Þetta sést á útgjaldaliðum bæjarins sem er í flestum málaflokkum hærri en hjá nágrannasveitarfélögum. Við höfum líka lært að í bænum býr einstaklega gott og fjölbreytt fólk. Fólkið er stolt af bænum sínum.

Af hverju Björt framtíð?
Allir eiga að hafa val. Við bjóðum valkost sem gengur ekki út á langa lista loforða, heldur einlægan áhuga á að hlusta, læra og leysa þau vandamál sem að steðja í samvinnu og sátt. Við bjóðum nýja nálgun sem virkjar hugmyndir og krafta íbúanna. Við þekkjum af eigin raun hvað má ná miklum árangri með æðruleysi, heiðarleika og hugrekki að leiðarljósi. Aukum lífsgæðin, styðjum lífshlaupið og tryggjum lífsréttindin. Bragðaðu einn bita áður en þú segir að þetta sé vont og kjóstu Æ í Garðabæ.