Lewis Hamilton vann á Monza

Lewis Hamilton vann ítalska kappaksturinn eftir að hafa ræst á ráspól en tapað forystunni í ræsingu. Liðsfélagi hans hjá Mercedes, Nico Rosberg varð annar eftir óheppileg mistök. Felipe Massa á Williams átti rólegan dag en náði í þriðja sætið.

Ræsing Hamilton var afleidd, hann tapaði 3 sætum á fyrsta hring. Hann kvartaði í talstöðinni yfir að bíllinn skipti ekki úr rásham. Liðinu tókst að endurræsa hugbúnaðinn og Hamilton gat haldið ótrauður áfram.

Valtteri Bottas átti líka slaka ræsingu. Hann ræsti þriðji en varð ellefti eftir ræsinguna. Bottas tók svo til við að vinna upp sætin sem hann hafði tapað. Hann nýtti fyrstu beygjuna mikið til að taka fram úr. Hann endaði í fjórða sæti.

Max Chilton strandaði í mölinni á sjötta hring. Þetta er önnur keppnin á ferlinum sem hann klárar ekki.

„Þetta voru ökumannsmistök, mín sök, ég læsti aðeins dekkjunum og flaug yfir kantinn. Þetta voru eingöngu mín mistök og ég vil biðja liðið afsökunnar,“ sagði Chilton þegar hann kom aftur á þjónustusvæðið.

Hamilton náði öðru sæti af Bottas á tíunda hring. Þá voru tæplega 2,4 sekúndur í Rosberg. Hamilton gat þá hafið eltingarleikinn.

Hamilton náði fyrsta sætinu af Rosberg á hring 28. Rosberg missti af fyrstu beygjunni og þurfti að fara langa leið til að komast aftur inn á brautina. Hamilton hafði nýlega fengið skilaboð um að halda sig vel fyrir aftan Rosberg. Skilaboð sem hann hunsaði með þeim afleiðingum að hann náði forystunni.

Fernando Alonso hætti keppni á 28. hring vegna bilunar í gírkassanum. Þetta er því fyrsta keppnin sem Alonso klárar ekki í ár. Hingað til hafði hann náð í stig í hverri keppni á tímabilinu hann var sá eini sem gat enn státað af því. Það eru 86 keppnir síðan Alonso hættir vegna bilunar í bíl sínum.

Kevin Magnussen á McLaren fékk 5 sekúndna refsingu fyrir að þvinga Bottas út af brautinni í fyrstu beygju.

Daniel Ricciardo fékk að heyra í talstöðinni á 45. hring að „Þú ert talsvert fljótari en Vettel, náum honum.“ Áhugaverð skilaboð sem skiluðu sér. Á 46. hring tók hann fram út ríkjandi fjórföldum heimsmeistara.

„Við erum liðsfélagar og vinir, verðum alltaf vinir, sagði Hamilton aðspurður hvernig samband hans og Rosberg er.

„Því miður gekk þetta ekki upp í dag. Lewis keyrði mjög vel og á þetta skilið,“ sagði Rosberg sem virtist ögn bældur á verðlaunapallinum.

„Ég er ánægður með fyrsta verðlaunasætið á tímabilinu. Það er meira á leiðinni frá mér,“ sagði Massa sem var hæst ánægður með afrakstur dagsins.

Úrslit ítalska kappakstursins 2014:

1.Lewis Hamilton - Mercedes - 25 stig

2.Nico Rosberg - Mercedes - 18 stig

3.Felipe Massa - Williams - 15 stig

4.Valtteri Bottas - Williams - 12 stig

5.Daniel Ricciardo - Red Bull - 10 stig

6.Sebastian Vettel - Red Bull - 8 stig

7.Sergio Perez - Force India - 6 stig

8.Jenson Button - McLaren - 4 stig

9.Kimi Raikkonen - Ferrari - 2 stig

10.Kevin Magnussen - McLaren - 1 stig

11.Daniil Kvyat - Toro Rosso

12.Nico Hulkenberg - Force India

13.Jean-Eric Vergne - Toro Rosso

14.Pastor Maldonado - Lotus

15.Adrian Sutil - Sauber

16.Romain Grosjean - Lotus

17.Kamui Kobayashi - Caterham

18.Jules Bianchi - Marussia

19.Esteban Gutierrez - Sauber

20. Marcus Ericsson - Caterham

Fernando Alonso - Ferrari - kláraði ekki

Max Chilton - Marussia - kláraði ekki

Bilið á milli Hamilton og Rosberg í baráttunni um heimsmeistaratitilinn er nú 22 stig. Spennan eykst þegar keppnunum fækkar.