Vill ekkert af dramatísku myndbandi Óla Geirs vita

Óli Geir, athafnamaður og plötusnúður úr Keflavík, hefur birt hádramatískt uppgjörsmyndband á YouTube, sem hann kallar „Ég gefst aldrei upp“. Sjá má Óla Geir gera ýmsar æfingar í lyftingasal og undir hljómar dramatísk tónlist og brot úr barátturæðum kvikmyndapersóna á borð við Rocky og svo ræða úr myndinni Any Given Sunday sem Al Pacino flytur af miklum krafti, auk annarra. Þá eru myndir af úrklippum úr fjölmiðlum, sem fjölluðu um miður vel heppnaða tónlistarhátíð sem Óli Geir stóð að í fyrra; Keflavik Music Festival, en vanefndir Óla Geirs og félaga urðu til þess að fjöldi tónlistarmanna, sem boðað hafði komu sína, afbókaði.

Myndbandið hefur fallið vel í kramið og nú þegar hafa um 15 þúsund manns séð myndbandið, sem ekki hefur verið nema rúma sólarhring inni á YouTube.

Franz Gunnarsson tónlistarmaður úr hljómsveitinni Ensími, gagnrýndi opinberlega hvernig staðið var að málum varðandi tónlistarhátíðina og í myndbandinu er mynd af honum og Óla Geir, úrklippa og verður ekki betur séð en þeir séu samherjar. Franz lýst ekki á blikuna. „Nei, hann er þarna í einhverri svakalegri ævingarútínu, virðist í bardaga uppá líf og dauða og það er eins og ég sé einhver samherji hans í þessu „actioni“. Svo er ekki,“ segir Franz. En, það var einmitt svo að þessi téða úrklippa byggði á klúðri Fréttablaðsins. (Sem svo var leiðrétt á Vísi.) „Þessi samsetta mynd voru mistök, ég tilgreindur sem Pálmi félagi hans líkt og ég hafi verið samstarfsaðili hans að þessari Keflavíkurhátíð,“ segir Franz og vil taka það skýrt fram að svo er ekki, heldur þvert á móti. Hann vandaði Óla Geir og félögum ekki kveðjurnar á sínum tíma, svo mjög að þeir töldu Franz ásamt fleirum standa á bak við aðför á hendur sér og hugðust sækja hann til saka vegna þess, en ekkert varð reyndar úr því.

„Miklar blammeringar um að þetta hafi verið samantekin ráð hjá mér og öðrum um að rústa þessari hátíð sem er alger vitfirring,“ segir Franz sem ætlar sér ekki að grípa til neinna aðgerða þó hann sé óvart aukaleikari í þessu upprisumyndbandi Óla Geirs.

„Neinei, maður gæti náttúrlega farið í að fá einhvern lögfræðing en maður nennir ekki að standa í því. Læt duga þessa yfirlýsingu, sem ég birti á Facebook duga og þá er það frágengið af minni hálfu.“