Saksóknari mótmælti skýrslutökum í Al-Thani málinu

Björn Þorvaldsson hjá sérstökum saksóknara lagði fram greinagerð í Héraðsdómi Reykjavíkur í morgun þar sem hann mótmælti því að lögmenn Hreiðars Más Sigurðssonar, fyrrverandi forstjóra Kaupþings, og Ólafs Ólafssonar fjárfestis fengu að kalla til ný vitni í skýrslutöku áður en Al-Thani málið verður tekið til meðferðar í Hæstarétti. Hreiðar Már var dæmdur í fimm og hálfs árs fangelsi og Ólafur í þriggja og hálfs árs fangelsi í desember 2013. Áfrýjuðu þeir dómnum til Hæstaréttar líkt og Sigurður Einarsson, fyrrverandi stjórnarformaður Kaupþings, sem hlaut fimm ára fangelsi og Magnús Guðmundsson, fyrrverandi forstjóri Kaupþings í Lúxemborg, sem fékk þriggja ára dóm. 

Þórólfur Jónsson, lögmaður Ólafs, fer fram á að Eggert J. Hilmarsson, fyrrverandi framkvæmdastjóri lögfræðisviðs Kaupþings í Lúxemborg, verði kallaður aftur til vitnistöku. Í samtali við Vísi segir Þórólfur sérstakan ekki hafa upplýst um það við meðferð málsins í héraði að Eggert sætti sjálfur rannsókn sem síðar var látin niður falla.

„Við teljum það augljóslega skipta máli. Hann hefur beinan hag af því að losna undan saksókn í þeim málum,“ segir Þórólfur. Það hefði átt að taka fram við meðferð málsins.

Hörður Felix Harðarson, verjandi Heiðars Más, óskar eftir því annars vegar að sjö vitni gefi skýrslu. Þeirra á meðal eru Jón Óttar Ólafsson, fyrrverandi starfsmaður sérstaks saksóknara sem gagnrýndi embættið mjög fyrir störf sín í Fréttablaðinu á dögunum, og sömuleiðis Ólafur Þór Hauksson, sérstakur saksóknari. 

Hins vegar óskar Hreiðar Már eftir því að saksóknari leggi fram tölvupóstssamskipti sem hann hafi átt við Halldór Bjarkar Lúðvíksson, fyrrverandi starfsmanni fyrirtækjasviðs Kaupþings. Halldór Bjarkar var lykilvitni í Al-Thani málinu en hann var undirmaður Hreiðars Más hjá Kaupþingi og kom að láninu sem Kaupþing veitti Gerland, félagi Ólafs Ólafssonar.

Reiknað er með því að málið verði flutt í héraði á næstu dögum.