Er bláa pillan lausnin?

Frammistöðukvíði hrjáir marga karlmenn, sérstaklega unga og frekar óreynda. Svo mælti ungur myndarlegur maður er við sátum og teyguðum einn jólaöl. Ætli það hafi ekki þurft nokkra sopa til að losa um málbeinið því þetta var greinilega umræða sem er viðkvæm og orð sem erfitt var að segja upphátt.

Ég velti því fyrir mér hvað fælist í því, var hann að tala um að ná honum ekki upp eða að hann fengi það of snemma eða jafnvel að hann vissi bara ekkert hvað hann ætti að gera og hvernig ætti að gera það. Allt þetta reyndist vera innifalið í orðunum frammistöðukvíði. „Mér finnst eins og við eigum að kunna allt og bara geta og gera." Þetta er ekki í fyrsta sinn sem ég heyri ungan mann hafa áhyggjur af þessu en ég hef aðeins heyrt af þessu frá strákum sem kela við stelpur.

Þá er nokkuð áhugavert í þessu samhengi, að í einum tíma þegar við töluðum um sjálfsfróun þá svaraði ein stúlkan: „Æ, þetta er svo mikið vesen, hann bara gerir eitthvað, á hann ekki að kunna þetta?"

Þegar stórt er spurt er oft fátt um svör. Af hverju eiga karlmenn að kunna á konur í kynlífi (nú eða aðra karlmenn)? Af því þeir hafa séð klám? Frammistöðukvíði getur stafað af allskonar ástæðum en mig grunar að undirstaðan liggi í að útskýra að kynlíf sé þekking á eigin líkama. Einnig að segja bólfélaganum hvað þér þykir gott og að spyrja hvað viðkomandi þyki gott.

Í einum tíma kom ungur maður til mín og talaði um risvandamál sitt og hvað honum þætti skrýtið og mikið vesen að vera farinn að taka Viagra, aðeins 16 ára gamall. Við sátum saman í dágóða stund og fórum saman í gegnum málin.

Honum gat risið hold, hann gat stundað sjálfsfróun, hann gat fengið fullnægingu en þegar það kom að því að kela með annarri manneskju, þá varð hann ekki nógu harður.

Þegar við köfuðum dýpra þá komu allskonar flækjur í ljós með erfiðum tilfinningum eins og svikum og höfnun. Auðvitað er erfitt að ná honum upp við þrúgandi aðstæður, það er meira en skiljanlegt og þar er blá pilla ekki lausnin.

Elskhugar og bólfélagar þessa heims, það er ekki í ykkar höndum að kunna á líkama annarra heldur þurfið þið viljann til að læra. Það eina sem hægt er að biðja um í kynlífi er að þú þekkir þinn eigin líkama og komir fram við hann af virðingu.