Gunnar Karlsson skopmyndateiknari gefur ekki mikið fyrir gagnrýni sem skopmynd hans í Fréttablaðinu í dag hefur fengið. Hann segist þó vera hissa á viðbrögðunum.
Fréttablaðið birti í morgun skopmynd eftir Gunnar sem sjá má hér og vakið hefur misjöfn viðbrögð í þjóðfélaginu.
„Ég vissi svo sem að þetta gæti verið svona svolítið hættulegt að gera þetta. Venjulega hef ég verið nokkuð hlutlaus á kjördag en einhvern veginn endaði þessi svona í þetta skiptið,“ segir Gunnar í samtali við Vísi.
Hann segist telja að hlutverk hans sé aðallega að myndskreyta umræðuna í þjóðfélaginu. „Ég er ekkert að þessu til að koma mínum skoðunum á framfæri og mér finnst umræðan í þessum kosningum, síðan hún [Sveinbjörg Birna Sveinbjörnsdóttir, oddviti Framsóknar og flugvallarvina] kom inn í framboðið hafa farið í þessa átt. Það hefur ekkert verið rætt um leikskóla eða önnur mál heldur aðeins þetta.“
Kosningastjóri Framsóknar og flugvallarvina sendi í morgun frá sér yfirlýsingu þar sem hann gagnrýnir skopmyndina harðlega og segir ritstjórn blaðsins hafa með birtingu myndarinnar „opinberað hatur sitt“ á Sveinbjörgu.
Ólafur Þ. Stephensen sagðist í kjölfarið í samtali við Vísi að Fréttablaðið hefði ekki hugsað sér að biðjast afsökunar á myndinni eða að beita skopteiknarana sína neinni ritskoðun.
Gunnar segist vera sammála Ólafi. „Eru það ekki allir? Væri ekki sérkennilegt að ritskoða svona lagað? Hann gæti þá bara valið að þiggja ekki myndirnar frá mér en ég held að hann sé ekki þannig maður.“
Hann segist þó skilja vel að Framsókn hafi tekið myndinni af Sveinbjörgu illa.
„Ég var nú svolítið hissa á því að þeir skyldu þekkja hana á myndinni,“ segir Gunnar.
