Sóley Tómasdóttir, oddviti Vinstri grænna í Reykjavík, segir stöðu flokksins í borginni alvarlega. Vinstri græn fá 5,8% fylgi í nýrri skoðanakönnun Fréttablaðsins og Stöðvar 2 sem birt var í morgun. Flokkurinn fær einn mann í borgarstjórn, en hann stendur afar tæpt.
„Ef að svo færi að Vinstri græn dyttu út úr borgarstjórn þá myndi þar með hverfa rödd sem hefur verið mjög mikilvæg frá því að Vinstri græn buðu fyrst fram. Við erum eini skýri valkosturinn sem talar fyrir raunverulegu félagslegu réttlæti, fyrir umhverfisvernd, kvenfrelsi og friðsælli borg. Við verðum að vera inni í borgarstjórn til að halda öðrum flokkum við það efni,“ segir Sóley.
Framsókn og flugvallavinir fá 9,2% fylgi í sömu könnun. Fylgi Framsóknar hefur rokið upp í borginni eftir að oddviti flokksins, Sveinbjörg Birna Sveinbjörnsdóttir lýsti sig mosku sem rísa á í Sogamýri við enda Suðurlandsbrautar. Sóley gagnrýnir málflutning Framsóknar harðlega.
„Mér finnst þetta sorglegt. Pólitík sem byggir á misrétti, sem gengur gegn minnihlutahópum og elur á fordómum á ekkert erindi í borgarstjórn Reykjavíkur.“
Stórsigur Samfylkingar
Það er allt sem bendir til þess að Samfylkingin vinni stórsigur í borginni. Samfylkingin er langstærsti flokkurinn í Reykjavík, fær 35,5% atkvæða og sex borgarfulltrúa. Samfylkingin tvöfaldar nærri fylgi sitt frá í síðustu kosningum en þá fékk flokkurinn 19,1% og þrjá borgarfulltrúa.
„Ég lít á þetta sem viðurkenning, ekki bara til okkar í Samfylkingunni heldur til meirihlutans. Borgarbúar vilja áfram hafa ró og ákveðin vinnufrið sem hefur skapast á þessu kjörtímabili,“ segir Dagur B. Eggertsson.
