Batman-morðinginn sakhæfur og sakfelldur

Hinn 24 ára gamli James Holmes var í kvöld sakfelldur fyrir að hafa skotið tólf manns til bana í kvikmyndhúsi í Aurora í Colorado fyrir þremur árum síðan.

Kviðdómur í Denver kvað upp niðurstöðu sína nú fyrir skömmu en aðalmeðferð málsins hafði staðið yfir í um 11 vikur.

Það tók hinar níu konur og þrjá karla sem skipuðu kviðdóminn þrettán klukkustundir að komast að niðurstöðu eftir að hafa hlustað á vitnisburð á þriðja hundrað manns.

Ákæran yfir honum var í 165 liðum; 24 lutu að morðum, 140 að tilraunum til manndráps og einn laut að sprengjutilræði. Verjendur Holmes héldu því fram við réttarhöldin að hann sé vanheill á geði en kviðdómurinn féllst ekki á það.

Farið fram á fátíða dauðarefsingu

Nú tekur við næsta skref í rétthöldunum þar sem dómurinn yfir Holmes verður ákveðinn. Saksóknarar hafa farið fram á dauðarefsingu yfir manninum en hún er afar fátíð í Colorado-fylki. Einn maður hefur verið tekinn af lífi á undanförnum fjórum áratugum.

Holmes hóf skothríð á miðnætursýningu batmankvikmyndarinnar The Dark Knight Rises 20. júlí árið 2012. Tólf manns létust í árásinni sem fyrr segir og um 70 særðust.

Þá fannst einnig mikið magn sprengiefna á heimili Holmes. Tæknideild lögreglunnar í Aurora þurfti að aftengja flóknar sprengigildrur áður en lögreglumann gátu rannsakað íbúðina.



Tekist á um ósakhæfi

Holmes var doktorsnemi í taugaskurðlækningum. Talið var að hann væri haldinn geðhvarfasýki en hann hafði verið í meðferð hjá geðlækni í aðdraganda skotárásarinnar.

Saksóknarnar virðast þó hafa samfært kviðdóminn um að Holmes hafi verið meðvitaður um væntanlegar afleiðingar gjörða sinna áður en hann lét til skarar skríða í kvikmyndahúsinu fyrir liðlega þremur árum síðan.