Stíliseraði Taylor Swift fyrir Blank Space

„Ég er búin að vera erlendis mjög lengi,“ segir stílistinn Edda Guðmundsdóttir hlæjandi og bætir við að hún komist ekki eins oft til Íslands og hún myndi vilja enda nóg að gera hjá henni í New York.

Þrátt fyrir að starfa sem stílisti og hafa náð gríðargóðum árangri á þeim vettvangi segir hún það hafa verið hálfgerða tilviljun að hún hóf störf sem stílisti. „Ég var í ballett og fór út til þess að dansa og einhvern veginn leiddist ég út í þetta,“ segir hún glöð í bragði.

„Ég hafði alltaf mikinn áhuga á tísku og kynntist manni sem var með fatafyrirtæki og fór að vinna með honum. Út frá því fóru svo ljósmyndarar að biðja mig um að aðstoða við myndatökur. Til að byrja með fannst mér svo ótrúlegt að fólk vildi borga fyrir eitthvað sem mér þótti svona skemmtilegt að gera,“ segir hún og bætir við: „Fyrr en varir var ég allt í einu farin að gera svolítið mikið af þessu og fattaði að þetta gæti verið eitthvað sem væri í raun og veru vinna.“

Stíliseraði myndband Taylor Swift

Taylor Swift er ein af skærustu poppstjörnum heimsins í dag og staðfesting á því fékkst heldur betur á VMA-verðlaunahátíðinni sem fram fór 30. ágúst þegar hún vann til flestra verðlauna á hátíðinni. Swift fór heim með fjögur verðlaun og var einnig sá listamaður sem hlaut flestar tilnefningar, alls tíu talsins. Myndbandið við lagið Blank Space vann til tveggja verðlauna á hátíðinni en Edda sá um stíliseringuna í myndbandinu og segir hún mikla leynd hafa hvílt yfir tökunum og hún geti því ekki sagt mikið frá þeim.

Leikstjóri myndbandsins var Joseph Kahn og framleiðandi Jil Hardin. Kahn hefur á ferlinum meðal annars leikstýrt auglýsingum fyrir stórfyrirtæki á borð við BMW, Hewlett Packard og Dox/NASCAR og myndböndum við lögin Toxic og Womanizer með Britney Spears og unnið til fjölda verðlauna. Edda segir þau Kahn og Hardin vinna mikið saman og gerðu þau stuttmyndina Power Rangers, sem hlaut talsverða athygli á internetinu en hún skartaði þeim James Van der Beek úr Dawsons Creek og Katee Sackhoff úr Battlestar Galactica í aðalhlutverkum.

Nóg um að vera

„Ég er að vinna við að gera sýningu fyrir tískuvikuna í New York og aðra sýningu fyrir tískuvikuna í París. Það er svona það næsta sem er að gerast núna í mínum vinnuheimi á næstu vikum.“

Tískuvikurnar í New York og París hefjast 9. september og standa yfir til 9. október og Edda segir þær spennandi og skemmtilegan tíma en þó ekki stærsta bita stílistans. „Það er svona smá eins og fínt business-kort,“ segir hún sposk og heldur áfram: „Það er alltaf lokamarkmiðið að fá stórar auglýsingar eða jafnvel bíómyndir. Það er þar sem stóru launin koma inn.“

Edda er með bókanir fyrir næstu tvö ár og er ánægð í New York. Meðal verkefna hennar á næstu árum eru verkefni fyrir Broadway og hún segir algengt að verkefni af slíkum stærðargráðum séu bókuð mörg ár fram í tímann. Einnig vinnur Edda með fatahönnuðinum Bernhard Willhelm fyrir tískuvikuna í París og heldur strax eftir hana til Los Angeles þar sem þau vinna að myndatöku en hún hefur unnið með honum síðastliðin þrjú ár og gerðu þau búninga saman fyrir danssýningu Cedar Lake Dance Company í Brooklyn Academy of Music.

Hún segir gaman að taka þátt í tískuvikunum þar sem öllu er til tjaldað og margra mánaða vinna loksins afhjúpuð. „Það er svo mikil sköpun í gangi. Fólk er búið að loka sig inni í marga mánuði og svo koma allir út og sýna það sem þeir eru búnir að vera að vinna að síðustu mánuðina. Það er gaman að vera hluti af því öllu saman.“ Í ár stíliserar hún fyrir fyrirtækið Chromat, sem meðal annars sá um stíliseringu á Superbowl-sýningu Beyoncé auk tónleikaferðar hennar, Mrs. Carter Show World Tour, og hafa stjörnur á borð við Madonna, Nicki Minaj, Ellie Goulding, Rita Ora og Azealia Banks klæðst flíkum frá merkinu sem stofnað var árið 2010.

„Þau eru einnig tilnefnd til CFDA-verðlaunanna, sem er svona eins og Óskarinn í tísku og fólk er að fylgjast mikið með þeim. Þetta er spennandi tími hjá þeim, þau eru að komast úr því að vera svona „underground“ fyrirtæki yfir á stærri markað. Ég er búin að vera ráðgjafi og að stílisera fyrir þau í nokkur ár og það er gaman að sjá þetta allt á uppleið,“ segir Edda en á meðal gesta á sýningunni verður ritstjóri bandaríska Vogue, Anna Wintour.

Lokakjóll sýningarinnar á tískuvikunum er gerður í samstarfi við fyrirtækið Intel og getur Edda ekki sagt mikið frá því þar sem mikil leynd hvílir að sjálfsögðu yfir loka­atriði sýningarinnar. „Þetta er svona hálfgert hjónaband á milli tækni og tísku sem ég held að sé framtíðin í tískunni,“ segir hún að lokum.