Húsfyllir þegar tískusýning tók yfir Ásmundarsal

Dóra Júlía Agnarsdóttir skrifar 9. apríl 2025 07:01

Tískusýning Sóleyjar Jóhannsdóttur sló í gegn í Ásmundarsal. Ásmundarsalur

Gestir flykktust að í Ásmundarsal síðastliðinn laugardag þegar fatahönnuðurinn Sóley Jóhannsdóttir frumsýndi sína fyrstu fatalínu, Sleepwalker. Yfir 200 manns mættu og viðbrögðin létu ekki á sér standa.

Sóley útskrifaðist með meistaragráðu í fatahönnun frá Institut Français de la Mode í París og hefur starfað hjá tískurisum á borð við Louis Vuitton og Paul Smith. Hún hefur verið búsett í París síðastliðin 8 ár en ákvað að frumsýna sína fyrstu línu hérlendis.

Línan sækir innblástur í svefngöngu og draumkennt ástand undirvitundar en Sóley segir að hún hafi fengið innblástur frá vinkonu sinni sem á það til að ganga í svefni.

„Línan er innblásin af þessu draumaástandi, þegar fólk gengur um í svefni og fer að gera alls kyns rugl, eins og að klæða sig í föt á algjörlega ómeðvitaðan hátt,“ segir Sóley en þessi hughrif móta snið og hönnun línunnar, sem spanna flæðandi rómantískar flíkur yfir í grófar, stórar yfirhafnir.

„Eftirvæntingin var áþreifanleg þegar fyrsta módel steig á svið og ætlaði lófataki aldrei að linna að sýningu lokinni. Bláa Lónið gaf gjafapoka, módelin komu frá Ey agency og veitingar voru í boði Ásmundarsalar. Sýningin fór fram í innsetningu Bryndísar Bolladóttur, Ljóstillífun, sem opnaði á HönnunarMars og gerði umgjörðina áhrifaríkari og upplifunina einstakari,“ segir í fréttatilkynningu frá Ásmundarsal.

Hér má sjá myndir af hátísku herlegheitunum: