Illugi svaraði síðast fyrir málið í Bítinu á Bylgjunni í morgun þar sem hann sagðist ekki eiga von á að umræðunni um þetta mál linni og sagðist vera með hreina samvisku.
Sjá einnig: „Geri mér ekki endilega vonir um að það linni öllum árásum í þessu máli“
Segir umræðuna á lágu plani
Ásthildur Sturludóttir deildi viðtalinu við Illuga í Bítinu á Facebook-síðu sinni þar sem hún sagði nóg komið af Orku Energy-málinu. „Það virðist vera lenska fjölmiðla að reyna með reglulegu millibili að afhausa stjórnmálamenn,“ segir Ásthildur. Hún segist þekkja það af eigin reynslu þegar faðir hennar, Sturla Böðvarsson, var í stjórmálum. „Þegar fjölmiðlar reyndu ótrúlegustu hluti sem áttu sér enga stoð í raunveruleikanum.“
Ásthildur segir umræðuna um Illuga ekki sanngjarna og á lágu plani. „Illugi er einn af mínum kærustu vinum og ég þekki hann nógu vel til þess til að vita að hann er heiðarlegur og sannur og vill gera sitt allra besta í sínum störfum. Öll þessi umræða er á lágu plani og ömurleg á allan hátt.“
Hildur Sverrisdóttir grípur til varna fyrir Illuga eftir að hafa lesið grein rithöfundarins Guðmundra Andra Thors sem birtist í Fréttablaðinu í gær. Hildur bendir á að þó svo að Illugi hafi viðurkennt að hafa gert mistök með því að koma ekki fyrr með útskýringar umfram þær sem honum bar skylda til samkvæmt upplýsingaskyldu þringmanna og að enginn maður geti bent á hvað hann hafi gert ólöglegt, þá virðist eiga að hafa hann í skammarkróknum og draga þar inn alls konar aðra þætti á mismálefnalegan hátt.
„Mér finnst Guðmundur Andri falla í þá gryfju.“
Hidlur segir umræðuna um Orku Energy-málið hafa farið langt út fyrir öll skynsemismörk. „Meira að segja fréttastofa RÚV, sem alla jafna er sú grandvarasta, þurfti að biðjast afsökunar á að hafa birt sem fullyrðingu óstaðfestan róg. Þá erum við í einhverri skrýtinni stemningu komin of langt og staðreyndirnar farnar að víkja fyrir einhverju sem ég satt best að segja kann ekki að nefna en hef smá áhyggjur af.“
Elliði Vignisson bendir á að Össur Skarphéðinsson, Jóhanna Sigurðardóttir Katrín Jakobsdóttir og Guðbjartur Hannesson sem öll hefðu verið vistödd undirritun samninga tengdum Orku Energy, líkt og Illugi Gunnarsson.
Elliði segir á heimasíðu sinni að svo virðist vera sem staðreyndir málsins skipti orðið litlu þar sem Illugi hefði farið langt út fyrir upplýsingaskyldu sína í þessu máli með því að opinbera launaseðla frá Orku Energy. „Sjálfur hefði ég ekki bara gert það sama og Illugi gerði, ég hefði gengið langtum lengra í þessa röngu átt. Ég hefði skaðað mig enn meira í þeirri viðleitni að vernda einkalífið.“
Hann segir málið hafa skaðað Illuga en umræða um afsögn hans sem ráðherra sé ekki í takt við neinn veruleika.
Kristján Þór Júlíusson heilbrigðisráðherra sagði í samtali við morgunútvarp Rásar 2 í gær að þetta mál hefði veikt Illuga en sé þó ekki þannig vaxið að það geti leitt til afsagnar hans sem ráðherra.
„Staða hans er einfaldlega þannig að hann hefur svarað ágætlega fyrir sín mál á síðustu dögum. Hann hefði vissulega mátt svara því fyrr. Það er bara sá hinn sári veruleiki sem við stöndum oft frammi fyrir stjórnmálamenn að við grípum kannski seint til svara. Við erum stundum seinþreyttir til vandræða en þetta er einfaldlega þannig vaxið mál að hann hefði betur komið fram með þessi svör fyrr,“ sagði Kristján við RÚV.
Brynjar Níelsson bendir á að þeir sömu sem setja út á Illuga sjái hins vegar ekkert varhugavert við það að stjórn borgarinnar gefi Pétri og Páli verðmætar lóðir. „Einhverjir gætu með góðum rökum sagt þetta vera pólitíska spillingu af verstu gerð. Hvað sem því líður getum við allavega verið sammála um að „spilling“ ráðherrans geti komið landi og þjóð vel en „spilling“ ráðamanna í borginni er bara til tjóns.“
Ólöf tekur skýringar Illuga gildar
Þá var Ólöf Nordal innanríkisráðherra spurð út í málefni Illuga í Harmageddon í Íslandi í dag í gær þar sem hún ræddi stöðu Sjálfstæðisflokksins. Nefnt var að Hanna Birna Kristjánsdóttir hefði sagt af sér sem innanríkisráðherra og að þær raddir hefðu heyrst að Illugi ætti að segja af sér.
Hún sagði Illuga hafa gert grein fyrir sínum málum í fréttum. „Ég veit ekki betur en að hann hafi afhent sinn launaseðil í beinni útsendingu á þessari stöð. Ég spyr samt að því að á einhverjum tímapunkti hlýtur það að vera þannig að þeir sem eru í stjórnmálum hafi líka, þeir þurfa í fyrsta lagi að fara eftir reglum og gera allt rétt, en menn hafi líka sama frið til að hafa sín prívat mál í lagi. Ég er ekki á því að við eigum öll að fara að opna okkar heimilisbókhald.“
Frosti Logason spurði Ólöfu hvort henni þætti skýringar Illuga trúverðugar. „Hver fær fyrirframgreidd þrjár milljónir laun?“ spurði Frosti og sagðist Ólöf ekki vita neitt meira um þetta mál en þáttastjórnendur. „Ég tek bara hans skýringar gildar í þessu máli. “
