Bílskúrinn: Taktar í Texas

Náttúruöflin minntu hressilega á sig í Austin, Texas um helgina, rigningin tók öll völd á laugardaginn. Lewis Hamilton varð heimsmeistari á sunnudaginn.

Var rigningin meira en ökumenn réðu við? Hvers er að vænta það sem eftir er af tímabilinu? Hvað var í gangi í hausnum á Nico Rosberg rétt eftir keppnina? Þetta og fleira í Bílskúrnum, uppgjöri hvers kappaksturs hér á Vísi.

Ökumenn sýna hvað þeir geta

Rigningin og rokið settu strik í reikninginn um helgina, brautin var á floti um tíma og ómögulegt var að senda bílana út á laugardaginn þegar tímatakan var áætluð. Henni var því frestað til sunnudags.

Þá var ennþá rigning, við slíkar aðstæður má á milli greina á milli góðra ökumanna og þeirra afburðargóðu. Síðari hópurinn gerði færri mistök og tókst að lang mestu leyti að aka um. Góðu ökumennirnir voru meira að glíma við sína bíla, fóru ekki eins mjúklega að þeim og áttu í meiri erfiðleikum með að fóta sig á brautinni.

Haft hefur verið orð á því að ökumenn í Formúlu 1 séu ekki eins góðir og þeir voru. Helsta ástæðan fyrir því að margir telja að svo sé er sú að bílarnir eru betri. Aðallega eru þeir límdari við veginn og tilþrifin felast í öðru en að fara á hlið í gegnum beygjur og skipta um gír með gírstöng.

Nú á dögum sést hliðarskrans og annað sem margir sakna einna helst í aðstæðum eins og þeim sem veðurguðirnir buðu uppá í Texas. Það getur enginn sagt lengur að ökumennirnir kunni ekki að keyra. Þvílíkt tilþrif sem margir sýndu. Það er svo sannarlega ekki búið að gengisfella hæfileika Formúlu 1 ökumanna.

Hamilton heimsmeistari

Hamilton lýsti deginum sem „besta í lífi mínu.“ Keppnin einkenndist af dramatík og framúrakstri um alla braut.

Hamilton hefur unnið tíu keppnir af 16 á tímabilinu, einu sinni hætt keppni og í 14 keppnum komist á verðlaunapall. Það er helst til svakalegur árangur.

Hamilton varð fyrst heimsmeistari ökumanna 2008 með McLaren, eftir að hafa orðið annar árið áður, sem einnig var hans fyrsta ári í Formúlu 1. Það má því segja að hann hafi byrjað með látum.

Hamilton varð svo heimsmeistari í fyrra með Mercedes liðinu og tryggði sér svo titilinn núna á sunnudag, aftur með Mercedes. Hann er fyrsti breksi ökumaður sögunnar sem tekst að verja heimsmeistaratitil sinn í Formúlu 1.

Einungis fjórir ökumenn hafa unnið fleiri titla en Hamilton, en fimm aðrir eru jafnir honum með þrjá. Sebastian Vettel er sá eini sem enn ekur í Formúlu 1 og hefur unnið fleiri titla en Hamilton.

Hvað var sagt þegar Hamilton fór til Mercedes?

Þegar Hamilton fór til Mercedes frá McLaren létu margir ýmis orð falla um þá ákvörðun. Hamilton var að fara frá liði sem þá gat unnið keppnir og var í baráttunni, til liðs sem átti erfitt.

Tilkynningin kom í september 2012. Það er áhugavert að líta til baka og athuga hver sagði hvað, sérstaklega með tilliti til þess í hvaða stöðu McLaren er í dag.

„Að einhver skuli fara frá McLaren til mercedes vegna þess að hann vill vinna eru mistök að mínu mati. hvort sem þú horfir á síðustu fjórar keppnir, fjögur eða fjörtíu ár erum við frábært lið. Ég myndi segja öllum sem vilja vinna keppnir í þessari íþrótt að koma til Mclaren,“ sagði Martin Withmarsh, þáverandi liðsstjóri McLaren.

„Það er mjög töff að hafa Lewis sem liðsfélaga! Það verður skemmtileg áskorun,“ sagði Rosberg.

„Þetta er hans ákvörðun, ég held persónulega að þetta sé ekki rétt ákvörðun,“ sagði Jenson Button ökumaður McLaren.

„Ég skil hann. Maður þarf stöðugt að vera að leita af nýjum áskorunum. Ég held að McLaren sé ekki auðveldasta liðið til að vera hjá. Ég held að hann verði miklu hamingjusamari hjá Mercedes,“ sagði Fernando Alonso sem þá ók fyrir Ferrari en er svo kominn aftur til McLaren.

Það er vinsælt að tala um að sokka þennan og annan þessa dagana, ætli Hamilton hafi ekki efni á að sokka alla sem sögðu skiptin slæma hugmynd. Hann gæti þurft að ganga berfættur í einhvern tíma enda gríðarlegur fjöldi sem leist ekkert á val hans.

Hvar liggur spennan núna?

Margir kunna að spyrja sig hvað er spennandi við Formúlu 1 núna, þegar báðir titilarnir eru komnir til Mercedes.

Svarið við því er einfaldlega 2016, restin af tímabilinu mun gefa vísbendingar um mögulega breytta goggunarröð næsta árs. Verður Ferrari sterkur keppinautur Mercedes? Verður Red Bull með yfir höfuð og hvað gerir Haas F1?

Það eru margt að gerast í Formúlu 1 þessi misserin sem er afar spennandi. Brautin sem keppt verður á í Mexíkó, næstu helgi er spennandi, þaðan hefur enginn núverandi ökumaður reynslu. Vélarnar gætu verið að breytast mikið og hugsanlegt er að horfið verði aftur til fortíðar þar sem V8 vélar réðu ríkjum, eða fyrir 2014.

Annað sem er spennandi að fylgjast með er hvernig liðin raðast upp í keppni bílasmiða, því verðlaunafé ræðst að stórum hluta af úrslitum þeirrar keppni.

Nico Rosberg og derhúfu dissið

Rosberg gerði mistök sem kostuðu hann forystuna. Hann missti bílinn í spól á mjög einkennilegan hátt undir lokin, Hamilton stökk á tækifærið og tók fram úr. Mistökin urðu til þess að tryggja Hamilton heimsmeistaratitilinn.

Það var því ósköp erfitt að finna ekki aðeins til með Rosberg eftir keppnina, þrátt fyrir að líkurnar á að hann yrði heimsmeistari hefðu ekki verið neitt gríðarlega miklar.

Stríðnin gaus upp í Hamilton í herbergi sem ökumenn sem komast á verðlaunapall fara inn í eftir keppnina. Þar er iðulega að finna vatn og handklæði, menn geta þurrkað af sér svitann og fengið sér vatnssopa. Þarna er líka að finna derhúfur styrktaraðila sem allir eiga að vera með í verðlaunaafhendingunni.

Hamilton langaði greinilega að vera hugulsamur eða nudda salti í sárin, hann kastaði derhúfunni sem Rosberg átti að vera með til hans. Rosberg var allt annað en ánægður og kastaði henni til baka.

Rosberg sagði svo eftir á: „Þetta var bara leikur okkar á milli, ekkert alvarlegra en það, ég er fyrst og fremst svekktur út í sjálfan mig fyrir að hafa gert þessi mistök sem kostuðu mig unna keppni.“

Myndband af atvikinu má sjá hérna fyrir neðan.