Hamilton finnst hugmynd Horner hlægileg

Eftir slakt gengi í fyrstu keppni tímabilsins kallaði liðsstjóri Red Bull, Christian Horner eftir aðgerðum til að minnka forskot Mercedes.

Horner óskaði eftir því að FIA gerði breytingar til að jafna möguleika liðanna. Hann benti á að aðdáendur íþróttarinnar væru óánægðir með ástandið.

Lewis Hamilton, ríkjandi heimsmeistari ökumanna gerir lítið úr ósk Horners.

„Mér finnst þetta virkilega fyndið, þetta er áhugaverð skoðun frá einhverjum sem hefur náð svo miklum árangri. Það að hann hafi strax eftir fyrstu keppni séð ástæðu til að tjá sig finnst mér mjög fyndið,“ sagði heimsmeistarinn og ökumaður yfirburða liðs Mercedes.

„Það heyrðist aldrei frá okkar liði nein ósk um jafnari keppni. Núna erum við besta liðið, við lögðum allt í sölurnar og stóðum okkur mjög vel og ég er virkilega stoltur af því,“ sagði Hamilton að lokum.