Bítast um hver sé hin eina og sanna Kylie

Ástralska söngkonan Kylie Minogue og hin bandaríska Kylie Jenner há nú baráttu fyrir dómstólum um það hvor þeirra eigi rétt á vörumerkinu „Kylie“ í Bandaríkjunum.

Jenner er ein Kardashian-systra og er þar af leiðandi hvað þekktust fyrir „hlutverk“ sitt í raunveruleikaþáttunum Keeping up with the Kardashians. Hún vill nú fá einkarétt á vörumerkinu „Kylie“ fyrir snyrtivörulínu sína sem og fatalínu.

Í liðinni viku mótmælti Minogue hins vegar kröfunni á þeim grundvelli að ef Jenner fengi einkarétt á Kylie-nafninu myndi það heldur betur rugla bandaríska aðdáendur Minogue í ríminu og eyðileggja hennar vörumerki sem Kylie Minogue.

Í andmælum Minogue er Jenner lýst sem „annars flokks raunveruleikastjörnu“ auk þess sem rakin er gagnrýni sem Jenner hefur sætt frá samfélagi svartra í Bandaríkjunum og fötluðum, meðal annars fyrir að sitja fyrir í hjólastjól í myndatöku fyrir tímaritið Interview.

Aftur á móti er Kylie Minogue lýst sem heimsþekktum tónlistarmanni og baráttukonu gegn brjóstakrabbameini. Í dag hefur Minogue einkarétt á vörumerkjunum „Kylie Minogue“, „Kylie Minogue Darling,“ sem er ilmvatn sem hún framleiðir, og „Lucky – the Kylie Minogue musical.“