Konfetti og gleðitónar í bænum

Mér finnst alltaf ótrúlega gaman að spila, skemmtilegasta fólk sem ég þekki er með mér í hljómsveit og það er alltaf gaman hjá okkur,“ segir Lóa Hjálmtýsdóttir. Hún kemur fram ásamt hljómsveit sinni, FM Belfast og Emmsjé Gauta á tónleikum á Húrra í kvöld.

FM Belfast hefur ekki spilað mikið hérlendis undanfarið en hljómsveitin er þekkt fyrir fjöruga tónleika þar sem allir dansa með. „Við spiluðum á risa tónleikum í Sydney í janúar fyrir næstum þrjátíu þúsund manns. Við vorum að hita upp fyrir Flaming Lips. Það var mjög skemmtilegt og eftir tónleikana fengum við aðdáendabréf frá yngsta aðdáenda okkar, 8 ára áströlskum gutta,“ segir Lóa. „Þetta var mikið grín og gott að losna af landinu í janúar.“

Einn meðlimur sveitarinnar er búsettur í Brussel og þegar þetta er skrifað er óvíst að hann muni koma til landsins á tónleikana vegna hryðjuverkaárásanna sem gerðar voru í borginni á þriðjudag. „Við erum enn að bíða, það er ekki alveg vitað með flug en við vonum að hann komist,“ segir Lóa. Það er misjafnt hverjir spila með sveitinni hverju sinni. „Þetta er eiginlega eins og hálfgerður lukkupakki fyrir þá sem mæta oft á tónleika hjá okkur, hver er að spila með. Það er einn sem er alltaf með en restin valsar inn og út. Það eru allir í svo mörgu alltaf, ef þetta væri ekki svona þá myndum við aldrei gera neitt. Við erum öll komin með börn og í alls konar vinnum og verkefnum hér og þar. Við hittumst ekki það oft utan vinnutímans þannig það er extra bónus að fá að hanga með þeim heilan dag og kvöld,“ segir Lóa en hljómsveitin hefur verið að vinna að nýju efni undanfarið. „Ég þori samt ekki alveg að lofa að við tökum nýju lögin á tónleikunum en það er aldrei að vita.“

Tónleikarnir hefjast klukkan 21 og hægt er að nálgast miða á Tix.is.