Jón Valdimar Jóhannsson, Íslendingur sem alþjóðalögreglan (e. Interpol) lýsti eftir í upphafi sumars að ósk lögregluyfirvalda á Íslandi vegna ákæru fyrir stórfellda líkamsárás fyrir rúmum tveimur árum, er kominn í leitirnar. Þetta staðfesta starfsmenn héraðssaksóknara í samtali við Vísi. Jón mun hafa fundist fljótlega eftir að lýst var eftir honum í maí.
Málið er til meðferðar hjá Héraðsdómi Reykjavíkur og hefur verið þingfest. Jón Valdimar neitar sök í málinu en honum er gefið að sök að hafa hrint karlmanni á skemmtistaðnum Spot í Kópavogi með báðum höndum með þeim afleiðingum að hann hlaut lífshættulega og alvarlega höfuðáverka.
Í ákæru yfir manninum kemur fram að fórnarlambið hafi fengið heilamar í yfirborði bæði ennisblaða og gagnaugablaða, yfirborðsáverka á litla heila vinstra megin, byrjandi blóðsöfnun undir heilahimnu á gagnauga hægra megin auk fleiri meiðsla sem leitt hafi til heilaskaða.
Meðal annars með varanlegri heyrnarskerðingu á hægra eyra, tapi á lyktar- og bragðskyni, hægingu í hugsun, gloppóttu minni, kvíða, þunglyndi auk skertu andlegu og líkamlegu þoli og úthaldi.
Krafist er rúmlega 50 milljóna króna í skaða- og miskabætur af hendi Jóns Valdimars auk málskostnaðs. Fyrirtaka í málinu er fyrirhuguð þann 8. september.
Leicester City
Manchester Utd
