Mannkynið að brenna út á tíma í loftlagsmálum

Júlí og ágúst eru heitustu mánuðir á jörðinni frá því mælingar hófust. Sérfræðingar Veðurfarsstofnunar Sameinuðu þjóðanna segja að það sem áður var talið afbrigðilegt veðurfar, sé komið til að vera. Brýnt sé að snúa þessari þróun við.

Clare Nullis upplýsingafulltrúi Veðurfarsstofnunar Sameinuðu þjóðanna sagði á fréttamannafundi í Genf í dag að mörg óþægileg veðurfarsmet hafi verið slegin á þessu ári og hafi bæði Evrópumenn og íbúar Norður Ameríku verið að kafna úr hita í sumar. Á meginlandi Evrópu hefur hiti yfir þrjátíu gráðum verið viðvarandi undanfarnar vikur og það sama á við um aðrar heimsálfur.

„Þetta var heitasti ágústmánuður sem skráður hefur verið og hann kemur í kjölfar júlímánaðar sem samkvæmt upplýsingum NASA er heitasti mánuður sem nokkurn tímann hefur verið mældur,“sagði Nullis.

Þá hafi verið slegið enn eitt hitametið það sem af er árinu og Veðurfarsstofnun Sameinuðu þjóðanna treysti sér til að fullyrða að árið í ár verði það heitasta á jörðinni frá því mælingar hófust.

„Við höfum orðið vitni að óvenjulega miklum hita langtímum saman og þetta virðist ætla að verða hin nýja regla. Hið óvenjulega er ekki lengur óvenjulegt, það er að verða normið. Auk þessa methita slær nú magn koldíoxíðs í andrúmsloftinu öll met og við sjáum mjög hátt hitastig sjávar sem hefur stuðlað að meiri kóraleyðingu en nokkru sinni fyrr,“ segir Nullis.

Áhrifa loftslagsbreytinganna gætir um allan heim. Þannig hopar Grænlandsjökull hraðar en menn töldu sem og norðurskautsísinn og jöklar á Íslandi. Þetta mun valda hækkun sjávarborðs með ófyrirséðum afleiðingum á landslag víða um heim og um leið á þjóðfélög víða á jörðinni.

Loftslagsbreytingarnar eru nú orðnar svo hraðar að það er raunveruleg hætta á að mannkynið missi af tækifærinu til að snúa þróuninni við með hörmulegum afleiðingum.

„Þörfin á að staðfesta, og það sem er enn mikilvægara, að innleiða Parísarsamkomulagið er meira áríðandi en nokkru sinni fyrr. Plánetan okkar sendir frá sér neyðarkall og við verðum að bregðast við, við verðum strax að draga verulega úr losun gróðurhúsalofttegunda,“ segir Clare Nullis.