Formlegar stjórnarmyndunarviðræður flokkanna hófust í dag og sitja nú formenn flokkanna þriggja á fundi í fjármálaráðuneytinu þar sem ræða á stjórnarsáttmála og það er helst nýir þingmenn Pírata sem virðast vera ósáttir við Óttarr og Bjarta framtíð en Píratar buðu meðal annars Bjartri framtíð formlega til þreifinga um stjórnarmyndun fyrir kosningarnar, sem Björt framtíð tók þátt í.

Jón Þór Ólafsson, oddviti Pírata í Suðvesturkjördæmi, segir að Óttar Proppé sé „vingjarnlegasti og kurteisasti maður sem þið hittið“. Jón Þór spáir því þó að í ríkisstjórnarsamstarfi með Sjálfstæðisflokknum muni Óttarr verða hataður.
„Eflaust þolir hann ekki að vera hataður eins og mun gerast þegar hann styður aftur og aftur og aftur spillingu forystu XD í þingsal, á nefndarfundum, í atkvæðagreiðslum,“ skrifar Jón Þór á Facebook-síðu sína.
„Það má búast við linnulausri stórskotahríð stjórnarandstöðunnar á þinginu ef þessi veika 32 þingmanna ríkisstjórn verður að veruleika. Ég get ekki trúað því að hún hefði burði til að hanga lengi en kannski er það partur af planinu. Það yrði þá þriðja ríkisstjórn Sjálfstæðismanna í röð sem ekki næði að klára heilt kjörtímabil og tækist sennilega að stúta BF endanlega í leiðinni, stöðugleiki indeed,“ skrifar Gunnar Hrafn.
„Í alvöru BF? Stjórnarsamstarf með tvöföldum Sjálfstæðisflokki? Jæja - þá er draumurinn um margra radda félagshyggjuríkisstjórn kannski endanlega úti. Bö. Allir tapa,“ skrifar Líf en fyrir kosningar horfðu margir til þess samstarfs sem Píratar lögðu til. Eftir kosningar var rædd um að tækist Bjarna Benediktssyni, formanni Sjálfstæðisflokksins, ekki að mynda ríkisstjórn ætti Katrín Jakobsdóttir, formaður VG, að fá tækifæri til að mynda ríkisstjórn.
Hallgrímur Helgason rithöfundur leggur orð í belg við Facebook-skrif Lífar og segir það ótrúlegt að Björt framtíð hafi ekki horft fyrst til vinstri.
„Hræðilegt að BF skuli ekki fyrst láta reyna á vinstristjórn eða stjórn til vinstri,“ skrifar Hallgrímur.
Þá sagðist Svandís Svavarsdóttir, þingmaður VG, vera hissa á því hversu fljótt Björt framtíð hefði horft til hægri en Svandís var gestur í Vikulokunum á Rás 1 fyrir hádegi.
Ég held að mörgum hafi orðið hvelft við, vegna þess hversu hratt Björt framtíð sneri sér við eftir kosningar. Það er ljóst að flokkurinn vildi ekki reyna á það samtarf sem lagt hafði verið upp með,“ sagði Svandís og vísaði þar til þeirra viðræðna sem áttu sér stað á milli Pírata, Samfylkingar, VG og Bjartrar framtíðar fyrir kosningar.

Í samtali við fréttastofu fyrr í dag sagði Óttar Proppé að þrátt fyrir þessar skiptu skoðanir væri flokkurinn í stjórnmálum til þess að hafa áhrif og því sé rétt að kann möguleikann á því að sitja í ríkisstjórn.
„Það er alveg augljóst að menn hafa haft mismunandi skoðanir á flokkum og við höfum verið að taka þátt í öflugri stjórnarandstöðu. En það er skilningur á því að við erum í pólitík til að hafa áhrif og koma okkar frjálslyndri miðjupólítik áfram. Út á það ganga stjórnarmyndunarviðræður að sjá hvort að það sé möguleiki að hafa áhrif til góðs.“
Óttarr segir að menn séu hóflega bjartsýnir á að geta myndað ríkisstjórn en ekkert sé þó víst í þeim efnum.
„Það er nokkuð ljóst í mörgum grundvallaratriðum er talsvert langt á milli þessara flokka miðað við hvernig talað var í kosningabaráttunni. Það þarf heilmikið til að menn nái saman.“