Barton mættur aftur til Burnley

Knattspyrnumaðurinn umdeildi Joey Barton er byrjaður að æfa með Burnley, sínu gamla félagi.

Jóhann Berg Guðmundsson er á mála hjá Burnley en Barton fór frá félaginu í maí og gekk í raðir skoska liðsins Rangers.

Barton, sem hefur margsinnis komið sér í klandur fyrir hegðun sína innan sem utan vallar, var rekinn frá félaginu eftir að honum sinnaðist við Andy Halliday, liðsfélaga sinn, á æfingu.

Sjá einnig: Rangers sagði upp samningi Joey Barton

Þá er verið að rannsaka hvort að Barton hafi brotið reglur skoska knattspyrnusambandsins um veðmál.

Barton spilaði vel með Burnley á siðustu leiktíð og hjálpaði liðinu að vinna ensku B-deildina. Hann var einnig valinn leikmaður ársins hjá félaginu.

Sean Dyche, stjóri Burnley, segir að Barton fái að æfa með liðinu til að koma sér í form en að ekkert sé ákveðið með framhaldið.

Enn fremur staðfesti hann að Barton sé ekki að æfa með aðalliði félagsins sem stendur.