Jóhann Berg skoraði og lagði upp í endurkomunni

Jóhann Berg Guðmundsson sneri aftur á fótboltavöllinn í dag þegar varalið Burnley vann 3-0 sigur á Preston North End.

Jóhann Berg hefur verið frá keppni síðan hann tognaði aftan í læri í leik gegn Manchester City 26. nóvember síðastliðinn.

Jóhann Berg minnti heldur betur á sig í leiknum í dag. Íslenski landsliðsmaðurinn lagði fyrsta mark Burnley upp fyrir James Tarkowski og skoraði svo annað markið með góðu skoti fyrir utan vítateig. Michael Kightly skoraði síðan þriðja mark Burnley.

Næsti leikur Burnley er gegn Middlesbrough á Turf Moor á annan í jólum og Jóhann Berg kemur væntanlega inn í leikmannahóp liðsins fyrir þann leik.

Jóhann Berg kom til Burnley frá Charlton Athletic í sumar. Hann hefur komið við sögu í 13 deildarleikjum í vetur; skoraði eitt mark og gefið eina stoðsendingu. Hann var í byrjunarliði Burnley í níu leikjum í röð áður en hann meiddist.