Mings í fimm leikja bann

Tyrone Mings, varnarmaður Bournemouth, hefur verið úrskurðaður í fimm leikja bann af enska knattspyrnusambandinu fyrir að stíga á höfuðið á Zlatan Ibrahimovic, framherja Manchester United, í leik liðanna á laugardaginn.

Mings steig á höfuðið á Svíanum undir lok fyrri hálfleiks. Nokkru síðar hefndi Zlatan sín með því að gefa Mings olnbogaskot. Hvorugur þeirra fékk refsingu hjá Kevin Friend, dómara leiksins.

Í gær var Zlatan úrskurðaður í þriggja leikja bann en United áfrýjaði ekki. Það gerði Bournemouth hins vegar en hafði ekki erindi sem erfiði.

Leiknum lyktaði með 1-1 jafntefli. Bournemouth er í 14. sæti ensku úrvalsdeildarinnar.