Flugfélagið WOW air flutti tæplega 167 þúsund farþega til og frá landinu í febrúar, en er um 170 prósent aukning frá fyrra ári.
Þetta kemur fram í tilkynningu frá WOW air. Sætanýting WOW var 87 prósent en það er sama sætanýting og í febrúar á síðasta ári.
„Sætanýtingin er sú sama þrátt fyrir 171% aukningu á sætaframboði í febrúar. Framboðnum sætiskílómetrum fjölgaði um 239% í febrúar frá því á sama tíma í fyrra.
Það sem af er árinu hefur WOW air flutt um 337 þúsund farþega en það er 198% aukning farþega á sama tímabili frá árinu áður.
WOW air mun frá lok mars fljúga tvisvar á dag til London, Parísar og Amsterdam. Félagið hóf áætlunarflug til New York í lok nóvember á síðasta ári og munu svo bætast við leiðarkerfið; Miami í apríl og Pittsburgh í júní. WOW air mun einnig fljúga daglega til Los Angeles og San Francisco. Í ár mun félagið fljúga til níu áfangastaða í Norður-Ameríku og er flogið allan ársins hring,“ segir í tilkynningunni.
Farþegafjöldi WOW air jókst um 170 prósent í febrúar

Tengdar fréttir

Erlendum ferðamönnum í febrúar fjölgaði um 47 prósent milli ára
Um 148 þúsund erlendir ferðamenn fóru frá landinu í síðasta mánuði samkvæmt talningum Ferðamálastofu.