Kvörtunum vegna lyktamengunar frá kísilverksmiðju United Silicon hefur snarfækkað á undanförnum dögum. Ofninn virðist vera að ná jafnvægi og segir sérfræðingur hjá Umhverfisstofnun að verksmiðjan eigi, ef allt er eins og það á að vera, að geta starfað í sátt við umhverfi sitt og nágrenni.
Ljósbogaofn United Silicon virðist vera að ná jafnvægi eftir vandræði undanfarna mánuði. Síðustu tíu daga hefur hitastigið í ofninum verið jafnt og samkvæmt upplýsingum frá Umhverfisstofnun hafa fáar kvartanir borist. Heilbrigðisstofnun Suðurnesja ekki heldur fengið neinar tilkynningar um öndunarfæravandamál síðustu daga.
Slökkt var á ofninum í dag milli klukkan níu og eitt vegna skipulagðs viðhalds en fram að því hefur ofninn verið í gangi eftir að hann var gangsettur aftur eftir að rafskaut brotnaði 25. maí síðast liðinn. Þar áður var slökkt á ofninum í um mánuð og segir öryggisstjóri fyrirtækisins það hafa alltaf legið fyrir að hnökrar yrðu á endurgangsetningu ofnsins sem tæki allt að þrjár vikur.
„Eftir svona langt stopp þá er fyllan í ofninum orðin köld og það tekur langan tíma að koma ofninum í jafnvægi. Þetta hefur gengið ótrúlega vel og í sjálfu sér ekkert komið upp sem að kom á óvart,“ segir Kristleifur Andrésson, framkvæmdastjóri öryggismála hjá United Silicon.
„Síðan um þar síðustu helgi þá hefur álag ofnsins verið um þrjátíu megavött. Við viljum auðvitað sjá það fara hærra til þess að hitastigið verði sem mest þannig að það eyði þessum lyktarmengandi efnum út,“ segir Einar Halldórsson, sérfræðingur hjá Umhverfisstofnun.
Í heildina frá því að ofninn var endurræstur hafa um hundrað og fimmtíu kvartanir borist til Umhverfisstofnunar. „Þeim hefur fækkað verulega frá því að ofninn hefur náð fullu álagi,“ segir Einar.
En er ekki komin niðurstaða í greiningu á sýnum sem Umhverfisstofnun hefur sent út til rannsóknar en að hún sé væntanleg á næstu dögum.
„Það er búið að eyða í þetta óheyrilegum fjárhæðum. Bæði endurbætur og síðan alls kyns búnaði sem hefur verið bætt við. Framleiðslutapið er mjög stór hluti líka en þetta er eitthvað sem að þarf til og skiptir verulega miklu máli fyrir samfélagið í heild, segir Kristleifur.
Sérfræðingur Umhverfisstofnunar segir verksmiðjuna eiga að geta starfað í sátt við umhverfi sitt og nágrenni.
„Samkvæmt öllu þá á verksmiðjan að gera verið í sátt við umhverfi sitt og íbúa í hverfum í Reykjanesbæ ef ofninn verður á fullu álagi og allt verður í lagi,“ segir Einar.
