„Sánchez er búinn að stimpla sig út“

Arsenal-hetjan Ian Wright segir að Alexis Sánchez sé búinn að stimpla sig út hjá félaginu.

Framtíð Sánchez er óráðin en samningur hans við Arsenal rennur út í sumar. Sílemaðurinn hefur ekki skrifað undir nýjan samning og talið er að hann gæti yfirgefið Arsenal í janúar.

Wright er langt frá því að vera sáttur við Sánchez og viðhorf hans.

„Það er eins og hann hafi stimplað sig út. Viðhorf hans segir margt um hann. Eins og hann er að spila núna get ég ekki séð hvernig brotthvarf hans muni veikja Arsenal. Hann er ekki að spila nógu vel,“ sagði Wright á BBC.

„Hann leggur sig ekki fram. [Philippe] Coutinho vildi fara. Hann bað um að verða seldur en sjáðu hvernig hann er að spila. Sjáðu hvernig [Mesut] Özil er að spila,“ bætti Wright við.

Eftir frábært tímabil í fyrra hefur Sánchez aðeins skorað fimm mörk í 13 leikjum fyrir Arsenal í vetur.