Kanadíska fjármálafyrirtækið Prospect Financial Group, sem Gordon Reykdal, ræðismaður Íslands í Edmonton í Kanada, stýrir, keypti 9,95 prósenta hlut í ALM Verðbréf. Halldór J. Kristjánsson, fyrrverandi bankastjóri Landsbanka Íslands, er framkvæmdastjóri hjá fyrirtækinu. Hinir fjárfestarnir fjórir keyptu hver um sig 5,94 prósenta hlut í ALM.
Um er að ræða þá Baldur Guðlaugsson, sem var í febrúar árið 2012 dæmdur í tveggja ára fangelsi fyrir innherjasvik og brot í opinberu starfi, og félögin KGK tveir ehf. í eigu Kjartans Gunnarssonar, Fjallatindar ehf. í eigu hjónanna Magnúsar Gunnarssonar og Gunnhildar Gunnarsdóttur og B30 ehf. í eigu hjónanna Stefáns Friðfinnssonar, fyrrverandi forstjóra Íslenskra aðalverktaka, og Ragnheiðar Ebenezersdóttur.
Kjartan, sem sat um árabil í bankaráði Landsbankans, er jafnframt hluthafi í verðbréfafyrirtækinu Virðingu og þá er Magnús Gunnarsson varamaður í stjórn Fossa markaða. Magnús hefur gegnt margvíslegum stjórnarstörfum í íslensku atvinnulífi, en hann var meðal annars forstjóri Sölusambands íslenskra fiskframleiðenda.
Arnar Jónsson, framkvæmdastjóri ALM Verðbréfa, segir afar jákvætt að félagið hafi fengið öfluga fjárfesta til liðs við sig.
Nokkur gerjun hefur verið á fjármálamarkaði undanfarið og hafa mörg félög reynt að leita leiða til þess að ná fram hagræðingu í rekstri. Þannig hefur Kvika til að mynda fest kaup á Virðingu og Öldu sjóðum. Aðspurður segir Arnar engin sérstök áform vera um sameiningar við önnur fjármálafyrirtæki. Hins vegar sé félagið ávallt opið fyrir öllum möguleikum sem bjóðast.
Þeir Baldur og Kjartan eru jafnframt hluthafar og stjórnarmenn í fyrirtækinu A Faktoring, sem sérhæfir sig í reikningakaupum án endurkröfu, en fyrirtækið á í margs konar samstarfi við ALM Verðbréf. Þannig veita fyrirtækin til að mynda saman milligöngu um fjármögnun, svo sem endurfjármögnun skulda eða langtímafjármögnun atvinnuhúsnæðis, fyrir fyrirtæki og fjárfesta. Er ALM Verðbréf enn fremur stór hluthafi í A Faktoring.

Arnar Jónsson er stærsti hluthafi ALM Verðbréfa með 27,6 prósenta hlut. Þar á eftir koma þeir Hjörtur H. Jónsson og Ísak S. Hauksson, með 17,25 prósenta hlut hvor, en þeir starfa báðir hjá fyrirtækinu. Annar starfsmaður, Þorvaldur Makan Sigbjörnsson, á 4,2 prósent.
Hagnaður ALM Verðbréfa nam um 13,5 milljónum króna í fyrra og dróst saman um 49 prósent á milli ára. Eignir fyrirtækisins jukust um 22 prósent á milli ára og námu rúmri 101 milljón króna í lok árs 2016. Var eiginfjárhlutfallið þá 125,1 prósent.
Fréttin birtist fyrst í Markaðnum, fylgiriti Fréttablaðsins um viðskipti og efnahagsmál.