Lukaku skoraði í sigri á WBA

WBA og Manchester United mættust í fyrri leik dagsins í enska boltanum í dag þar sem United fór með sigur af hólmi.

Fyrir leik var United í 2. sæti deildarinnar með 38 stig á meðan WBA var í næstneðsta sæti með 14 stig.

Það voru lærisveinar Mourinho sem voru sterkari aðilinn í þessum leik en hvorugu liðinu tókst þó að skora fyrstu 25 mínúturnar.

Á 27. mínútu fékk Marcus Rashford boltann á hægri kantinum og gaf frábæra fyrirgjöf inn á teig, beint á kollinn á Romelu Lukaku sem stangaði boltann í netið.

Á 35. mínútu dró aftur til tíðinda en þá skoraði Jesse Lingard annað mark United. Skot hans fór í Hegazi, varnarmann WBA, og í netið. Staðan var 2-0, United í vil, í hálfleik.

WBA tókst lítið að ógna marki United í seinni hálfleiknum fyrr en á lokakaflanum en þá skoraði Gareth Barry af stuttu færi eftir darraðadans í teignum og eftir það sótti WBA stíft að marki United.

United náði þó að halda út og hirti því stigin þrjú. Liðið er því komið með 41 stig í 2. sæti deildarinnar.