Bróðir Gylfa þjálfaði Harald Franklín

Haraldur Franklín Magnús, atvinnukylfingur úr GR, hóf leik í dag á fyrsta hring á Opna breska meistaramótinu í golfi, fyrstur íslenskra karlkylfinga.

Þessi 27 ára gamli Reykvíkingur spilar alla jafna á Nordic League-mótaröðinni sem er sú þriðja efsta í Evrópu þannig um risastórt tækifæri er að ræða fyrir Harald.

Í skemmtilegu viðtali við fréttastofu AP segir hann frá bakgrunni sínum eins og fjallað var um í morgun en hann ólst meðal annars upp við að spila miðnæturgolf og á völlum inn í miðju hrauni.

En, það er önnur staðreynd sem erlendum fréttamönnum finnst áhugaverð um Harald í ljósi árangurs íslenska fótboltalandsliðsins sem hefur heillað heimsbyggðina undanfarin ár.

Það er nefnilega þannig að fyrrverandi þjálfari Haraldar er Ólafur Már Sigurðsson, bróðir Gylfa Þórs Sigurðssonar, besta fótboltamanns Íslands. Ólafur var sjálfur frábær kylfingur og reyndar er Gylfi mjög góður líka.

Ólafur kom líka að þjálfun Gylfa litla bróður síns þegar að hann var ungur þannig að Ólafur Már hefur verið með puttana í þjálfun tveggja frábærra íslenskra íþróttamanna.

Hér má fylgjast með beinni textalýsingu frá Opna breska.