Formúlu 1 uppgjör | Ísmaðurinn með sögulegan sigur

Kimi Raikkonen stóð uppi sem sigurvegari í átjándu umferð Formúlu 1 sem fram fór í Texas-fylki í Bandaríkjunum um nýliðna helgi. Sigurinn var hans fyrsti frá því í mars árið 2013 og hafði Finninn því beðið í 113 keppnir eftir sigri, sem er nýtt met.

Annar á eftir hinum 39 ára gamla Raikkonen varð hinn 21 árs Max Verstappen á Red Bull bíl sínum og síðastur á verðlaunapalli varð Lewis Hamilton.

Úrslitin þýða að Hamilton tryggði sér ekki heimsmeistaratitilinn um helgina eins og flestir hefðu spáð. Hann þurfti að vinna Sebastian Vettel með átta stigum eða meira til að ná þeim árangri.

Vettel kom Ferrari bíl sínum heim í fjórða sæti og á því enn stærðfræðilega möguleika á titli.

Önnur mistök hjá Vettel á fyrsta hring

Rétt eins og á Suzuka-brautinni í Japan fyrir tveimur vikum klessti Þjóðverjinn á Red Bull bíl á fyrsta hring. Í þetta skiptið skullu hann og Daniel Ricciardo saman með þeim afleiðingum að Ferrari bíll Vettels hringsnerist.

Fyrir vikið var Sebastian dottinn niður í 14. sætið en eins og áður segir náði Sebastian að keyra sig upp í það fjórða.

Allt leit út fyrir að Vettel þyrfti að sætta sig við fimmta sætið í kappakstrinum á sunnudaginn. En glæsilegur framúrakstur á Valtteri Bottas á lokahringjum keppninnar tryggði Sebastian fjórða sætið, og þau 12 stig sem því fylgja.

Frábær akstur hjá Ísmanninum

Kimi Raikkonen áttaði sig sennilega á því fyrir kappaksturinn að þetta gæti orðið hans síðasti séns að bera sigur úr býtum í Formúlu 1 keppni.

Finninn, sem er 39 ára og mun aka fyrir Sauber á næsta ári, byrjaði á fremstu röð fyrir aftan Lewis Hamilton en á mýkri, gripmeiri dekkjum. Dekkjakostinn nýtti Kimi sér vel og komst fram úr Bretanum strax í fyrstu beygju.

Þetta var í fyrsta skiptið í 38 keppnum sem Ísmaðurinn fór upp um sæti á fyrsta hring. Hamilton fór mjög snemma inn á þjónustusvæðið í dekkjaskipti og fyrr en varir var hann búinn að ná Raikkonen aftur þrátt fyrir að Finninn átti eftir að fara inn.

Raikkonen keyrði listavel næstu hringi þar á eftir og tókst að halda Lewis fyrir aftan sig. Hamilton tapaði um það bil átta sekúndum á að festast fyrir aftan Ferrari ökumanninn.

Þessum átta sekúndum saknaði Bretinn sárt í lok kappakstursins eftir að hann var búinn að skipta aftur um dekk. Hamilton var hraðari en bæði Verstappen og Raikkonen en fann enga leið framhjá Red Bull ökuþórnum.

Max Verstappen var ánægður með annað sætið enda góð ástæða til, Hollendingurinn ungi byrjaði nefnilega kappaksturinn í átjánda sæti. Hinn 21 árs gamli Max hafði nú loksins aldur til að drekka kampavínið á verðlaunapallinum í Austin.

Lewis Hamilton þarf aðeins fimm stig úr síðustu þremur keppnum tímabilsins til að tryggja sér titilinn, það er ef Vettel vinnur þær allar.

Því er því ansi líklegt að Bretinn tryggi sér titilinn í Mexíkó um næstu helgi rétt eins og hann gerði í fyrra.