Birgir Leifur Hafþórsson átti ekki góðan hring á lokaúrtökumóti Evrópumótaraðarinnar í dag og er kominn í nokkuð slæma stöðu þegar mótið er hálfnað.
Birgir spilaði frábærlega fyrsta hringinn og átti góðan hring í gær og var í fínni stöðu þegar þriðji hringurinn hófst í dag á sjö höggum undir pari.
Hann spilaði hins vegar illa í dag og fékk aðeins einn fugl á móti fimm skollum, fór því hringinn á fjórum höggum yfir pari.
Birgir féll niður töfluna og er í 83.-96. sæti þegar þessi frétt er skrifuð og ekki allir búnir að ljúka leik.
Efstu 25 kylfingarnir fá þátttökurétt á Evrópumótaröðinni og þarf Birgir því að gera mun betur á næstu þremur hringjum ætli hann að ná inn á sterkustu mótaröð Evrópu.
Slæmur hringur Birgis sem er í erfiðri stöðu
