Við svo búið opnaði Lilja Dögg Alfreðsdóttir mennta- og menningarmálaráðherra vefinn með formlegum hætti.
Enginn nýgræðingur þó ung að árum sé
Ritstjóri frettbladid.is er Sunna Karen Sigurþórsdóttir og er því nýjasti ritstjóri Íslands. Sunna Karen er ung að árum, aðeins 26 ára gömul, en hún er þó enginn nýgræðingur í blaðamennsku. Hún hefur starfað á 365 miðlum frá árinu 2010; Vísi, Bylgjunni, Stöð 2 og Fréttablaðinu frá í nóvember 2017.
„Ég hef starfað í fjölmiðlum í um fimm ár, þar af lengst af á vefmiðli. Mér var boðið að taka þetta verkefni að mér á síðasta ári og ákvað strax að slá til, enda þykir mér spennandi að fá að taka þátt í stofnun nýs fjölmiðils, og að sama skapi verður þetta góður lærdómur inn í framtíðina. Verkefnið hefur verið strembið á köflum en við erum loks farin að sjá uppskeruna og erum afskaplega sátt við hvernig til hefur tekist,“ segir Sunna en það reyndist erfitt að ná hana til að setjast niður og ræða við blaðamann Vísis. Enda í mörg horn að líta.
Ætlaði sér í fréttamennskuna
Sunna Karen segir að áhugi á fjölmiðlum og blaðamennsku hafi gert vart við sig þegar á unglingsárum.

Stundirnar með Gissuri eftirminnilegar
Starf blaðamanns er fjölbreytt, enginn dagur er eins og Sunna segist ekki geta sagt af einhverju einu tilteknu eftirminnilegu atviki. „Þó eru morgunvaktirnar með Gissuri Sigurðssyni séu alltaf ofarlega í huga,“ segir Sunna.
Að sögn Sunnu Karenar hefur lengi staðið til að opna vefmiðil fyrir Fréttablaðið en farið var að ræða það af alvöru haustið 2016. „Við fengum til liðs við okkur breskt teymi sem hafði áður hannað nýtt útlit Fréttablaðsins. Hunter Studios heitir fyrirtækið.“
Sama ritstjórnarstefna og Fréttablaðsins
Vefurinn opnaði með óformlegum hætti í vikunni og Sunna Karen segir þetta hafa farið afskaplega vel af stað. „Það er virkilega öflugt teymi starfandi á vefnum og viðtökurnar hafa verið mjög jákvæðar.“
En, hver eru markmiðin?
„Markmið okkar eru að halda úti öflugum fréttavef með góðum og áreiðanlegum fréttum, en við erum á vaktinni kvölds og morgna. Við höfum opnað flottan fasteignavef og gefum fólki kost á að senda inn minningargreinar, en hingað til hafa minningargreinar ekki verið nægilega aðgengilegar. Svo munum við bjóða upp á ýmsar nýjungar sem munu líta dagsins ljós á næstu vikum og mánuðum. --- Í stuttu máli lútum við sömu ritstjórnarreglum og Fréttablaðið. Ritstjórnin er sjálfstæð og við segjum sannar og áreiðanlegar fréttir.“
Þróaður fasteignavefur
En, nú sagði Kristín Þorsteinsdóttir þá er vefurinn var opnaður fyrr í dag að þetta yrði öðruvísi vefur, hvernig þá?
„Fréttablaðið.is er hefðbundinn fréttamiðill. Við höfum lagt mikla vinnu í hönnun vefsins og að gera hann aðgengilegan og einfaldan í notkun. Ritstjórnin er afar metnaðarfull og ljósmyndadeild blaðsins sú öflugasta á landinu. Fréttirnar eru ítarlegar og unnar í samvinnu við ljósmyndara. Þær nýjungar sem þegar hafa litið dagsins ljós eru meðal annars minningargreinarnar – líkt og áður sagði – og fasteignavefurinn okkar sem er líklega sá þróaðasti á landinu, en þar er ýmis konar talnaefni og margt margt fleira. Við erum bara rétt að byrja og ýmislegt í farvatninu.“

„Ég er ekki farin að hugsa svo langt. Vefurinn er nýfarinn í loftið og ég tek eitt skref í einu. Sígandi lukka er best, er það ekki? Markmiðin eru að vinna góðar fréttir. Árangurinn kemur samhliða því.“
Sóknarfæri í minningargreinum
En, þú sérð sóknarfæri í minningargreinum og vönduðum fréttaflutningi? Finnst þér gat í markaði þar? Að fréttaflutning á Íslandi megi bæta?
„Ég er almennt ánægð með fréttaflutning á Íslandi. En með stofnun nýs fjölmiðils skapast aukin samkeppni og aukin pressa á að gera betur og meira. Varðandi minningargreinarnar, sem er raunar langt frá því eina sem við munum bjóða upp á, þá já – tel ég að þar hafi verið gat í markaði. Það hefur ekki verið aðgengilegur vettvangur fyrir minningargreinar og tel ég að við séum nú að bæta þar úr.“
Vísir vill nota þetta tækifæri og óska fyrrum samstarfsmönnum og öðrum aðstandendum hjartanlega til hamingju með daginn og hinn nýja vef.