Einhugur um að hætta við kaupin á WOW air

Fallið hefur verið frá kaupum Icelandair Group á WOW air en Icelandair greindi frá því fyrr í vikunni að ólíklegt væri að allir fyrirvarar í kaupsamningnum, sem var undirritaður 5. nóvember, yrðu uppfylltir fyrir hluthafafund félagsins sem haldinn verður í dag. Aðspurður segir Úlfar að einhugur hafi verið á meðal stjórnarmanna Icelandair um ákvörðunina.
„Við sáum fram á að fyrirvararnir yrðu ekki uppfylltir og þurftum því að komast til enda í þessu máli. Við erum að reka Icelandair og þurfum að sinna því. Fyrst og síðast þurfum við að hugsa um hagsmuni félagsins,“ segir Úlfar en á meðal fyrirvaranna var áreiðanleikakönnun sem var framkvæmd af Deloitte.
„Við höfðum ekki séð áreiðanleikakönnunina sem slíka af því að það var ekki búið að klára hana formlega en við heyrðum atriði úr henni á síðustu dögum.“
Ekki búið að semja um afskriftir
Eins og Fréttablaðið greindi frá í gær hefðu skuldabréfaeigendur WOW air getað þurft að samþykkja tugprósenta afskriftir af höfuðstól sínum til að kaup Icelandair á WOW air næðu fram að ganga. Úlfar segist ekki vita hvernig viðræðum á milli skuldabréfaeigenda og WOW um afskriftir hafi miðað.
„Það var algjörlega á forræði WOW air og við vitum ekki stöðuna á því. Við vitum bara að það var ekki búið að klára það,“ segir Úlfar og Bogi Nils Bogason, starfandi forstjóri Icelandair, hafði sömu sögu að segja í samtali við Fréttablaðið. „Nei, það var ekki komið á hreint,“ sagði Bogi.
Eins var ekki komið á hreint hversu stóran hlut Skúli Mogensen, forstjóri og eigandi WOW air, fengi í Icelandair en samkvæmt kaupsamningnum gat Skúli fengið á bilinu 1,8 til 6,6 prósent hlutafjár í Icelandair. Það réðist af niðurstöðu áreiðanleikakönnunarinnar.
„Það var heldur ekki komin niðurstaða í það enda hluti af heildarmyndinni. Þess vegna vorum við að miða við það að endanleg niðurstaða gæti ráðist á föstudagsmorgni en síðan var þessi sameiginlega ákvörðun tekin af því að staðan á fyrirvörunum var með þeim hætti sem hún er,“ segir Úlfar.
Lítil áhrif á hótelsöluna
Icelandair hóf nýlega formlegt söluferli á dótturfélagi sínu, Icelandair Hotels, en stefnt er að því að ljúka sölunni á fyrsta fjórðungi næsta árs. Aðspurður segir Úlfar að vissulega hafi verið rætt innan fyrirtækisins hver áhrifin yrðu ef allt fer á versta veg hjá WOW air.
„Hver sem niðurstaðan verður með WOW air þá verða einver áhrif til skemmri tíma en til lengri tíma eru þau minni og það liggur alveg ljóst fyrir að þeir aðilar sem hafa verið að skoða hótelin eru ekki að velta fyrir sér næstu mánuðum heldur næstu árum og áratugum. Þetta er stór fjárfesting.“
Þá þvertekur Úlfar fyrir að Icelandair hafi komið upplýsingum varðandi fjárhagsstöðu WOW air á framfæri við Samgöngustofu eins og fullyrt var við Fréttablaðið. „Samgöngustofa hefur aðgang að öllum upplýsingum sem hún þarf með beinum hætti þannig að hún þarf ekki milligöngu Icelandair eða nokkurs annars til að fá upplýsingar,“ sagði Úlfar.
Fréttablaðið spurði Boga Nils sömu spurninga og hann svaraði í svipuðum dúr. „Ég held að Samgöngustofa sé í sambandi við flugrekendur og geti kallað eftir gögnum en Samgöngustofa myndi aldrei kalla eftir gögnum frá þriðja aðila. Samgöngustofa er í beinu sambandi við WOW air með þeirra mál alveg eins og hún er í beinu sambandi við okkur um okkar mál,“ sagði Bogi Nils.
Tengdar fréttir

Hluthafi í Wizz air fjárfestir í WOW air
Bandarískt eignastýringarfélag er sagt fjárfesta í Wow air.

Icelandair og Festi hrundu eftir WOW-tíðindin
Hann var rauður, dagurinn í Kauphöllinni í dag.

Fallið frá kaupum Icelandair Group á WOW Air
Fallið hefur verið frá kaupum Icelandair Group á Wow air en kaupsamningur var undirritaður þann 5. nóvember sl.

Bjartsýnn á að önnur flugfélög fylli í skarðið
Aðalhagfræðingur Íslandsbanka segist bjartsýnn á að höggið á efnahagslífið við mögulegt brotthvarf félagsins yrði viðráðanlegt og að ferðaþjónustan og hagkerfið myndu rétta úr kútnum fyrr en seinna.

Starfsfólk WOW Air „jákvætt og bjartsýnt“ eftir fundinn
Svanhvít segir rekstur félagsins tryggðan en ekki sé búið að taka ákvörðun um uppsagnir hjá félaginu.

Skúli útilokar ekki að segja þurfi upp starfsfólki
Þá segir Skúli fjársterka aðila skoða kaup á félaginu, að því er fram kemur á vef Fréttablaðsins.

Mikilvægt að eyða óvissu því WOW air flytur fjóra af hverjum tíu farþegum
Airport Associates sem þjónustar WOW air sagði upp 237 starfsmönnum í dag en það er nær helmingur starfsfólks fyrirtækisins. Forstjórinn segir það varúðarráðstöfun. Hagfræðingar í greiningardeildum bankanna segja að það sé mikilvægt að eyða óvissu um framtíð WOW air sem fyrst.