Arsenal upp í 3. sætið eftir tíunda heimasigurinn í röð

Arsenal lyfti sér upp í 3. sæti ensku úrvalsdeildarinnar með 2-0 sigri á Newcastle United á heimavelli í kvöld.

Skytturnar eru búnar að vinna fimm af síðustu sex deildarleikjum sínum og vinna síðustu tíu leiki sína á Emirates í deildinni.

Aaron Ramsey kom Arsenal yfir með góðu vinstri fótar skoti á 30. mínútu.

Þegar sjö mínútur voru til leiksloka gulltryggði Alexandre Lacazette sigur Arsenal þegar hann skoraði sitt þrettánda deildarmark á tímabilinu.

Newcastle er í 14. sæti deildarinnar með 35 stig, sjö stigum frá fallsæti.