Síðasta umferð Domino's deildar karla í körfubolta fyrir jólafrí klárast í kvöld og sýnir Stöð 2 Sport beint frá tveimur leikjum.
Keflvíkingar þurfa að komast aftur á sigurbraut eftir tap í síðustu umferð vilji þeir ekki missa Stjörnuna of langt frá sér í toppbaráttunni.
Þeir fá ÍR-inga í heimsókn en ÍR er aðeins tveimur stigum á eftir Keflavík í deildinni.
Þór frá Þorlákshöfn, liðið sem vann Keflavík í síðustu umferð, fer suður með sjó og reynir að stöðva sigurgöngu Njarðvíkinga. Njarðvík hefur unnið fimm leiki í röð í deildinni og er aðeins topplið Stjörnunnar á lengri sigurgöngu.
Domino's deild kvenna er komin í jólafrí og uppgjörsþáttur kvennadeildarinnar verður á dagskrá strax á eftir leik Njarðvíkurs og Þórs.
HM í pílukasti er enn í fullu fjöri og verður vel fylgst með gangi mála þar í dag.
Allar upplýsingar um dagskrá og beinar útsendingar má sjá á heimasíðu Stöðvar 2.
Beinar útsendingar á sportrásunum í dag:
12:30 HM í pílukasti, Sport 2
18:20 Keflavík - ÍR, Sport
19:00 HM í pílukasti, Sport 2
20:10 Njarðvík - Þór Þorlákshöfn, Sport
22:10 Domino's Körfuboltakvöld kvenna, Sport
02:30 Opna ástralska mótið, Stöð 2 Golf
