Vilja alls ekki útskýra uppruna nafnsins

Hljómsveitin Bagdad Brothers á er leiðinni í sitt fyrsta tónleikaferðalag næstkomandi mánudag. Förinni er heitið til Norður-Ameríku en hljómsveitin ræðst ekki á garðinn þar sem hann er lægstur því planið er að ferðast nánast hringinn í kringum Bandaríkin. Ferðin hefst í Montréal þar sem kunningi sveitarinnar, June Mota, býr en hann sá um að bóka flesta tónleikana.

„Við kynntumst honum þegar hann kom hingað til lands. Hann langaði mikið að spila í Reykjavík og hafði samband við Póst-dreifingu, sem er grasrótarhreyfing listamanna sem við Sigurpáll stofnuðum ásamt fleirum. Því miður vorum við sjálfir með tónleika þetta kvöld en við kynntumst samt June og tókst ágætis vinskapur með okkur. Hann hafði svo samband með þá hugmynd að fara í tónleikaferð saman um Bandaríkin og Kanada,“ segir Bjarni Daníel Þorvaldsson.

Mjög góður lærdómur

Hljómsveitin var stofnuð af Bjarna og Sigurpáli Viggó Snorrasyni, en þeir spila báðir á gítar og syngja. Fyrir stuttu bættust við þau Steinunn Jónsdóttir sem spilar á hljóðgervla, Ægir Sindri Bjarnason á trommur og Þóra Birgit Bernódusdóttir sem spilar á bassa ásamt því að syngja með Bjarna og Sigurpáli.

„Stefnan er sem sagt að hitta June í Montréal, spila þar með sveitinni hans sem heitir un ashley. Svo keyrum við öll saman í rútu niður norðurströndina, síðan þvert yfir suðurríkin og að lokum upp austurströndina. Lokatónleikarnir verða í Vancouver. Þetta er náttúrulega svakaleg vegalengd og við gerum ráð fyrir að vera mánuð á leiðinni. Þetta verða í heildina um 26 tónleikar.“

Aðspurður segir Bjarni þau hafa langað að taka þetta einfaldlega alla leið fyrst þau væru yfirleitt að standa í því að fara í tónleikaferð.

„Við hugsuðum að þetta yrði mjög góður lærdómur og ákváðum bara að kýla á þetta. Ef okkur tekst þetta, þá ættum við að vera fær í flestan sjó þegar kemur að tónleikaferðum. Í flestum tilfellum eru þetta tónleikar í minni kantinum en á sumum stoppum erum við að spila á frekar flottum og stórum tónleikastöðum.“

Reyna að vera raunsæ

Hann sagði ferðina mjög mikið miðaða út frá því að bæta í reynslubankann, þau séu ekki að leggja of mikla pressu á sjálf sig um að allt gangi fullkomlega upp, þó að það væri auðvitað óskandi.

„Það verður ekki mikill tími til að gera mikið annað en að spila tónleika og keyra, við erum alveg búin að átta okkur á því. Við erum nógu raunsæ og sjáum að mögulega þurfa einhverjar dagsetningar að færast til ef við erum sein á því. En það verður bara að koma í ljós. Þetta verður í það minnsta ævintýralegt.“

Bjarni segir sveitina hafa verið duglega að spila undanfarið og dugi hagnaðurinn af því langt fyrir kostnaðinum við ferðina.

„Við erum búin að spila alveg ótrúlega mikið undanfarið, allavega 50 tónleika á innan við ári hugsa ég. Þannig að við náðum að safna ákveðinni summu fyrir ferðalaginu, sem við spöruðum. Svo gistum við í flestum tilvikum í heimahúsum hjá kunningjum eða tónleikahöldurum í ferðinni, svo sá kostnaðarliður er ekki stór.“

Enginn kvartað hingað til

Talið berst að nafni sveitarinnar enda hlýtur það eðlilega að vekja spurningar hvort vel sé tekið í sveit nefnda eftir höfuðborg lands sem Bandaríkin hafa átt í stríði við.

„Við höfum enn engar athugasemdir fengið út af nafninu. Það kemur okkur smá á óvart. Við tókum upp lög með útvarpsstöðinni KEXP frá Seattle fyrir myndbandasíðuna Youtube. Enginn hefur sérstaklega haft orð á því að nafnið sé óviðeigandi og flestir hlustendur virðast vera frá Bandaríkjunum. En við tökum enga sénsa og höfum því auglýst tónleikana úti undir styttingunni BB.“

Hann segir þó að nafnabreytingin sé ekki varanleg og um leið og þau snúi aftur til landsins verði sveitin aftur gamla góða Bagdad Brothers. Bjarni víkur sér þó undan öllum spurningum um uppruna nafnsins.

„Ég væri eiginlega til í eða sleppa að svara því,“ segir Bjarni hlæjandi og bætir svo við að lokum: ,,Þetta var einhver svo hræðilega vandræðalegur og lélegur brandari milli okkar Sigurpáls. Skrifaðu bara að ég vilji ekki útskýra, það er allt í lagi.“

Bagdad Brothers spilar í síðasta sinn undir því nafni í bili á Húrra á föstudag kl. 20.00. Ókeypis er á tónleikana en varningur frá bandinu verður til sölu og tekið er við með þökkum á móti frjálsum framlögum til styrktar tónleikaferðalaginu.