Sportveiðiblaðið: Breytingar í Þverá - Kjarrá

Nýir leigutakar taka við Þverá - Kjarrá vonast til þess að auknar sleppingar á veiddum á laxi auki heildarveiðina um 15 til 20 prósent. Þetta kemur fram í Sportveiðiblaðinu sem kom í verslanir fyrir nokkrum dögum.

Í blaðinu kennir ýmissa grasa. Meðal annars er þar að finna viðtal við flugukastsnillinginn Klaus Frimor; Ólaf Vigfússon í Veiðihorninu; viðtal við Vilborgu Reynisdóttur, nýjan formann Stangaveiðifélags Hafnarfjarðar; veiðilýsingu á Geirlandsá og yfirlit yfir veiðimöguleika á Vestfjörðum.

Aðalefnið í blaðinu er þó viðtal við Ingólf Ásgeirsson, sem er í forsvari fyrir nýja leigutaka Þverár - Kjarrár. Auk Ingólfs, standa þeir Davíð Másson og Halldór Hafsteinsson að veiðifélaginu Starir, sem eins og áður sagði tekur við Þverá - Kjarrá á næsta ári.

Í viðtalinu segir Ingólfur að engar grundvallarbreytingar verði gerðar í Þverá - Kjarrá. Til að mynda verði ekki bætt við stöngum og sömu leiðsögumenn og verið hafi við ána verði áfram með nýju leigutökunum.

Samkvæmt Ingólfi mun helst þrennt breytast. Í fyrsta lagi verður aukin áhersla á sleppingar á veiddum laxi. Með því telur Ingólfur mögulegt að auka veiðina um 15 til 20 prósent. Í öðru lagi verður Litla-Þverá, sem rennur í Þverá um 18 kílómetrum fyrir ofan ármótin við Hvítá, gerð að sérstöku tveggja stanga svæði. Þar verður boðið upp á sér veiðihús þar sem veiðimenn sjá um sig sjálfir. Í þriðja lagi verður boðið upp á sjóbirtingsveiði með laxavon eftir 20. ágúst á svæðinu fyrir neðan Kaðalstaðahyl. Þar verða tvær stangir en ekkert veiðihús.

Lesa má meira um fyrirætlanir nýju leigatakanna í Þverá-Kjarrá og margt fleira í Sportveiðiblaðinu.

trausti@frettabladid.is