Meiri kröfur en áður um að starfsfólk sé tilbúið til að læra eitthvað nýtt

Þegar við hugsum um alþjóða fyrirtækið Coca Cola dettur okkur fæstum í hug nýsköpun. Fyrirtækið er 130 ára gamalt og þarf ekki frekari kynningar við. En þegar yfirmaður í ráðningum talar um nýsköpun og nýjar áherslur í mannauðsleit er vert að staldra við og lrggja við hlustir.

Í viðtali við CBS fyrir stuttu, sagði Stacey Valy Panayiotou, Senior Vice President of Global Talen and Development hjá Coca Cola, að fyrirtækið leggi nú áherslu á að finna rétta fólkið til starfa með nýsköpun í huga. Sagan hafi kennt þeim að fyrirtækið þurfi að varast stöðnun og að falla í gryfjur aldurs- og fyrri velgengni. Það geri fyrirtækið með því að hugsa um nýsköpun. Í vöruþróun þekkjum við svo sem til þess að gosdrykkjaframleiðendur hafa átt sínar hæðir og lægðir. Í dag er umræðan þó helst til neikvæð þegar kemur að sykruðum gosdrykkjum.

Fyrirtækið ætlar að bregðast við meðal annars með breyttum áherslum í ráðningum starfsfólks. Þar sé nú lögð áhersla á að fólk sé ekki aðeins góðir hugmyndasmiðir og samstsarfsfélagar heldur er lögð sérstök áhersla á að finna starfsfólk sem sýnir áhuga á að læra stöðugt eitthvað nýtt. Já, að vera námsfús er orðið eftirsóknarvert.

Í viðtalinu nefnir hún dæmi þessu til útskýringar:

„Hópur markaðstjóra var að vinna að ákveðnu verkefni og í stað þess að sitja á fundum í fundarherbergi, skelltu þau sér til Chicago þar sem þau vörðu einum degi með tónlistarfólki og listamönnum og heimsóttu söfn til að fá innblástur. Þessi dagur skilaði verkefninu síðan mjög miklu.“

Viðtalið vakti athygli og segir til dæmis í umfjöllun nýsköpunarmiðilsins Innovation Excellence að þetta sýni og sanni að það að vera tilbúin til að vera stöðugt að læra eitthvað nýtt, sé hæfni sem er komin til að vera. Ekki síst fyrir fólk sem vill starfa í nýsköpunar- og vöruþróunarumhverfinu.

Við leituðum til Sverris Briem, ráðgjafa og einn eiganda Hagvangs og Rúnu Magnúsdóttur, stjórnendaþjálfa og stofnanda The Change Makers til að heyra hvað íslenskir sérfræðingar segja um málið.

Sama upp á teningnum á Íslandi

Sverrir Briem, ráðgjafi hjá Hagvangi segir æ fleiri fyrirspurnir um þessi mál berast á þeirra borð. Hjá Hagvangi sé nú horft meira á þetta en áður í ráðningaferlinu auk þess sem viljinn til þess að vera tilbúinn til að læra stöðugt eitthvað nýtt sé mælt í persónuleikaprófum.

„Fyrirtæki í starfa í síbreytilegu umhverfi og þessar breytingar verða hraðari og hraðari. Við finnum fyrir því að bæði fyrirtækin, starfsmenn og umsækjendur eru að átta sig á þessu. Það er því horft í auknum mæli til aðlögunarhæfni, hversu vel þú fylgist með og sért tilbúinn til að skoða nýja hluti.

Við fáum í auknum mæli fyrirspurnir um þessi mál og höfum verið að leggja aukna áherslu á að meta þessi atriði í ráðningarferlinu.

Þessi eiginleiki er auðvitað skoðaður í viðtölum en það „Að vera tilbúinn til að læra stöðugt eitthvað nýtt“ er hæfni sem hægt er að mæla með persónuleikamati. Þau persónuleikapróf sem við notum mæla einmitt þessa þætti.“

En þá má líka velta fyrir sér hvort það sé ekki mikilvægt fyrir hvern og einn að temja sér vilja til að vera tilbúinn til að læra stöðugt eitthvað nýtt, óháð atvinnuleit. Rúna Magnúsdóttir stjórnendaþjálfi segir þessar áherslur ekki aðeins eiga við starfsmenn heldur einnig stjórnendur.

„Þarna þurfa allir, stjórnendur sem almennt starfsfólk að taka meðvitaða ákvörðun um að halda glasinu okkar ekki bara hálf fullu heldur yfirfullu og stefna sameiginlega á að láta þessar breytingar verða til góðs. 

Skoðum þetta aðeins út frá boxa-aðferðafræðinni sem að ég nota. Í fyrirtækjum eru ákveðin kjarnabox, má þar nefna kynjaboxið, starfstitlaboxið, siðferðisboxið, fordómaboxið og menntaboxið svo að dæmi séu tekin. Sameiginlega býr þetta til menningu, viðhorf, venjur og staðla. Sum boxin eru góð, önnur slæm og svo eru til box sem eru hreinlega ljót. 

Á tímum breytinga eins og þeim sem við erum að horfast í augu við, þarf smá hugrekki til að opna þessi vinnustaða box, taka til í þeim, og henda út þeim boxum viðhorfum og venjum sem heldur mannauðnum frá sköpunarkraftinum.  Með slíkri tiltekt skapast óneitanlega verðmætt rými fyrir nýja sköpun sem er einmitt það sem fyrirtæki þurfa.“