Palace hafði betur á Old Trafford þar sem VAR kom mikið við sögu

Tímabilið byrjar ekki vel hjá Manchester United en þeir töpuðu gegn Crystal Palace á heimavelli í fyrsta leik tímabilsins hjá rauðu djöflunum.

Það voru liðnar sjö mínútur er Andros Townsend kom boltanum í netið. Jeffrey Schlupp slapp frá Victor Lindelöf, kom boltanum fyrir netið og Townsend skoraði með hægri.

Þannig stóðu leikar í hálfleik og gerðu United menn allt hvað þeir gátu til þess að jafna metin en það voru gestirnir frá Lundúnum sem fengu vítaspyrnu.

Eftir skoðun í VARsjánni komst Martin Atkinson, dómari leiksins, að þeirri niðurstöðu en boltinn fór í hönd Victor Lindelöf. Ekki var allri dramatíkinni lokið.

David de Gea varði nefnilega vítaspyrnuna frá Jordan Ayew en eftir skoðun VARsjánnar þá komst hún að því að spænski markvörðurinn var kominn af línunni og endurtaka þurfti spyrnuna.

Þá steig Wilfried Zaha á punktinn og skoraði af miklu öryggi. 2-0 fyrir Palace og stundarfjórðungur til leksloka en Hollendingurinn Donny van de Beek minnkaði muninn á 80. mínútu í sínum fyrsta leik.

Wilfried Zaha skoraði hins vegar annað mark sitt og þriðja mark Palace fimm mínútum fyrir leikslok og lokatölur 3-1.

Palace því með sex stig eftir fyrstu tvær umferðirnar en United án stiga eftir fyrstu umferðina. Vonbrigðarbyrjun þeirra.