Kompáslögmaður í þriggja ára fangelsi

Róbert Árni Hreiðarsson lögmaður var í dag dæmdur í þriggja ára óskilorðsbundið fangelsi fyrir kynferðisbrot gagnvart fjórum unglingsstúlkum. Þá var hann einnig sakfelldur fyrir vörslu barnakláms.

Ákæra á hendur Róberti var í níu liðum og sneru sex þeirra að kynferðsbrotum eða brotum á lögum um barnavernd. Þannig var honum gefið að sök að hafa árið 2005 í tvö skipti tælt 14 ára stúlku til kynferðismaka við sig gegn peningagreiðslum og blekkingum og með því að nýta sér yfirburði sína gagnvart stúlkunni vegna aldurs- og þroskamunar. Komst hann í samband við stúlkuna með því að villa á sér heimildir á Netinu og þykjast vera 17 ára strákur að nafni Rikki. Þá var Róbert einnig ákærður fyrir að hafa sent stúlkunni myndir af nöktum karlmanni að fróa sér.

Róbert var jafnframt ákærður fyrir að hafa í 15 skipti frá hausti 2005 til vors 2006, tælt aðra stúlku, þá 15 ára, til kynferðismaka með peningagreiðslum og blekkingum. Þar notaði hann einnig dulnefni á Netinu til þess að komast í samband við stúlkuna. Enn fremur var hann ákærður fyrir að hafa greitt þriðju unglingsstúlkunni fyrir að hafa kynferðismök við sig í Elliðaárdalnum gegn greiðslu.

Fjórðu stúlkuna, sem einnig var 15 ára, reyndi hann að ítrekað að tæla til kynferðismaka með boði um greiðslu og með því að nýta sér yfirburði sína gagnvart henni vegna aldurs- og þroskamunar, eins og segir í ákæru. Enn fremur var hann ákærður fyrir að borga stúlkunni fyrir að sýna á sér brjóstin og fróa sér í gegnum vefmyndavél.

Róbert var enn fremur ákærður fyrir vörslu barnakláms. Við leit á heimili hans fundust fimm myndbandsspólur og 104 ljósmyndir á hörðum diski tölvu hans sem sýndu börn á kynferðislegan og klámfenginn hátt. Þá fann lögreglan 121 ljósmynd á hörðum diski á tölvu í vinnu hans.

Mátti vita að stúlkan léti til leiðast

Dómurinn sakfelldi Róbert fyrir vörslu á myndbandsspólunum og langflestum ljósmyndunum í tölvum á heimili og í vinnu. Dómurinn komst enn fremur að þeirri niðurstöðu að Róbert hefði brotið lög með því að tæla fyrstnefndu stúlkuna til kynmaka til greiðslu.

Róberti hafi mátt vera það ljóst að miklar líkur væru á að stúlkan léti til leiðast um síðir og væri reiðubúin að hafa við hann kynferðismök til að afla fjárins. Hins vegar var hann sýknaður af því að hafa sent stúlkunni myndir af karlmanni að fróa sér í tölvupósti þar sem ekki hefði komið fram hvort stúlkan hefði séð myndirnar, en þær fundust í tölvu Róberts.

Héraðsdómur sakfelldi hann hins vegar fyrir alla aðra ákæruliði þar sem honum var gefið að sök að hafa tælt 15 ára stúlkur til kynferðismaka eða reynt að gera það.

Dómurinnn komst enn fremur að því að Róbert bæri að greiða stúlkunum samtals 2,2 milljónir í skaðabætur. Jafnframt voru tölvur og myndbandsspólur í hans eigu gerðar upptækar. Róbert var enn fremur sviptur lögmannsréttindum að kröfu saksóknara.

Hélt áfram brotum eftir að rannsókn hófst

Dómurinn segir að ljóst sé að Róbert hafi nýtt sér yfirburðastöðu sína í krafti aldurs síns og reynslu gagnvart unglingsstúlkunum sem voru á viðkvæmu kynþroskaskeiði. Allar stúlkurnar hafi átt við að stríða andlega og félagslega erfiðleika og sjálfsmynd þeirra því afar brothætt og hafi Róbert verið fullkunnugt um þetta.

Brot hans gagnvart einni fimmtán ára stúlkunni eru talin sérstaklega alvarleg þar sem hann hafði ítrekað við hana mök og brotaviljinn því einbeittur. Þá hafi hann haldið brotum sínum áfram eftir að honum var kunnugt um að hann væri grunaður um kynferðisbrot gagnvart 14 ára stúlkunni.

„Þá verður ekki hjá því litið að ákærði var starfandi lögmaður er hann framdi brotin en hann hefur m.a. annast hagsmunagæslu fyrir brotaþola í sakamálum og sinnt verjandastörfum í kynferðisbrotamálum. Voru honum því fyrirfram einkar ljósir hinir mikilsverðu hagsmunir er brot hans beindust gegn," segir enn fremur í dómnum.

Fjallað var um mál Róberts í Kompási fyrir viku þar sem kom að hann hefði haldið fullum réttindum sínum sem lögmaður þau tvö ár sem mál hans var rannsakað og dvalið löngum stundum í Barnahúsi við að yfirheyra fórnarlömb meintra kynferðisbrotamanna sem voru skjólstæðingar hans. Róbert hefur hins vegar haldið fram sakleysi sínu í málinu.

Dóminn í heild sinni má lesa hér.

Með fréttinni er myndskeið úr Kompási þar sem fjallað var um mál Róberts.