Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin.
Hvenær vaknar þú á morgnana?
„Vekjaraklukkan er stillt á tíu mínútur í sjö og verð ég að viðurkenna að það er snúsað á sama tíma og útvarpið er í gangi, þar sem síðan hefjast fréttir klukkan sjö. Fljótlega eftir fréttir er síðan farið af stað og beint út eftir hressandi sturtu.“
Hvað er það fyrsta sem þú gerir á morgnana?
„Ég byrja alltaf að fá mér einn kaffibolla sem er oftast kláraður strax við kaffivélina. Síðan helli ég í bollann aftur og byrja að skipuleggja daginn með að fara yfir fundi dagsins og þau verkefni sem eru framundan í vinnunni. Flestir dagar eru fullbókaðir á fundum og teymisvinnu þannig það er gott að stilla daginn af með yfirferð yfir daginn.“
Áhugamál utan vinnu nr.1?
„Mitt helsta áhugamál er golf. Það fer þó lítið fyrir því núna þessa dagana, en það fer að styttast í undirbúningstímabilið.
Það er búið að vera stefnan síðustu tuttugu ár að ná förgjöfinni undir tíu og oft hef ég verið nálægt því en aldrei náð því.
Ég er fullviss um að árið 2021 sé árið sem þetta langvarandi markmið náist, því þetta ár byrjar vel og það mikil bjartsýni fyrir þessu nýja ári eftir þetta fordæmalausa ár 2020.“
Í hvaða verkefni ertu að vinna helst í þessa dagana?
Fyrir utan hin hefðbundnu verkefnin á stofunni þá er áherslan núna á að ráða inn nýtt starfsfólk í ört vaxandi stafrænu deild okkar, en mikil aukning á alþjóðlegum verkefnum hafa krafist þess við þurfum aukin starfskraft.
Það er léttir að takast á við ný verkefni eftir áherslu á skipulag vegna samkomubanns og heimavinnu.
Nú getur flestallt starfsfólk mætt á vinnustaðinn og unnið betur saman, en stofunni er nú skipt upp í tvö sóttvarnarhólf með tuttugu manns í hvoru hólfi.“
Hvernig skipuleggur þú þig í vinnu?
„Ég tel mig vera nokkuð skipulagðann og er alltaf með „to do“ lista opinn í tölvunni minni. Þangað fara öll mín verkefni og eru listuð upp eftir mikilvægi. Síðan reyni ég að keyra niður listann yfir daginn, en það gengur ekki alltaf upp. Það gengur oft vel að keyra niður listann eftir klukkan fimm þegar flestir eru farnir heim og síminn hættur að hringja.
Annars er skipulagið gott í vinnunni þar sem við keyrum öll okkar verkefni í verkefna forriti sem heldur utanum verkefnin með öllum upplýsingum og þróun verkefna.“
Hvenær ferðu að sofa á kvöldin?
„Oftast fer ég að sofa um miðnætti og sem betur fer tekur það mig ekki langan tíma að sofna. Það kemur nú fyrir að þegar ég leggst á koddann þá poppa upp í hugann góðar hugmyndir fyrir einhvern af okkar viðskiptavinum.
Það hefur nú gerst að þessar hugmyndir hafi endað sem góðar herferðir, en ég kalla þetta „koddahugmyndir“ þegar ég fer yfir þær með teyminu. En oftast er það nú þannig að þær eru ekki eins góðar daginn eftir þó svo þær hafa virst sem verðlauna hugmynd áður en ég sofnaði.
