Getur hjálpað mikið að hætta á Facebook

Auðvitað fylgir samfélagsmiðlum margt jákvætt. Aðalmálið er að hver og einn sé þá örugglega við stjórn, en ekki að láta stjórnast og líði örugglega vel með þessa notkun. Því mörg erum við orðin háð samfélagsmiðlum, án þess að gera okkur grein fyrir því. 

Hér eru þrettán atriði sem sögð eru áhrif þess að hætta á Facebook eða öðrum samfélagsmiðlum. Þessi atriði hafa meðal annars áhrif á það hvernig þér gengur í vinnunni, í samskiptum, að halda einbeitingu eða að sporna við streitu. 

 1. Þú kemur meiru í verk á styttri tíma

Þegar tilkynningar eru að poppa upp á skjánum allan liðlangan daginn, erum við að verða fyrir truflun og áreiti. Það er líka alltaf eitthvað nýtt á Facebook.

Í raun er þetta ekkert ólíkt því og að vera stanslaust að multitaska. Þú ert að sinna verkefnum í vinnunni, en samhliða alltaf að fylgjast með því sem er að gerast. 

Rannsóknir hafa hins vegar sýnt að það að gera mjög margt í einu, getur leitt til fleirri mistaka, fljótfærni í ákvarðanatökum, dregið úr gæðum eða aukið líkurnar á kulnun svo fátt eitt sé nefnt.

2. Þú hleður batteríin oftar og betur

Í mörg ár hafa rannsóknir sýnt mikilvægi þess að taka sér reglulega smá pásur yfir daginn. Þá endurhlöðum við batteríin með því að gefa líkama og sál smá hlé. 

Þessar pásur skipta sköpum, því með smá hvíld aukum við getuna til að fá hugmyndir, sjá nýjar lausnir eða fá kraftinn til að bretta upp ermar og halda áfram.

Margir nýta hins vegar pásurnar sínar til að kíkja aðeins á Facebook, skrolla þar í smá stund og sjá hvað er að gerast. Fyrir vikið erum við ekki að gefa huganum hvíld. 

3. Kvíðinn við að hætta á Facebook (eða öðrum miðlum) hverfur

Flest okkar eru fyrir löngu orðin háð samfélagsmiðlum og eflaust súpa margir hveljur af þeirri tilhugsun að hætta að nota samfélagsmiðla. Því hvað ættum við þá að gera í staðinn?

Sérfræðingar segja þó að þessi kvíði sé ástæðulaust. Því eftir nokkra daga, án samfélagsmiðla, fer fólk að upplifa jákvæðar breytingar. Þessar jákvæðu breytingar birtast í margvíslegu formi og hafa áhrif á þig bæði í vinnu og utan vinnunnar.

4. Minni streita

Eitt af því jákvæða sem fólk upplifir þegar það hættir á samfélagsmiðlum er minni streita. Enda hættir fólk þá að að verða ekki fyrir stanslausri truflun og áreiti.

Og þegar að við erum afslöppuð, er einbeitingin okkar betri, við erum yfirvegaðri, eigum auðveldara með ákvarðanatökur og líður almennt betur.

5. Sjálfsöryggið eykst

Hamingjan sést á Facebook og það gæti því hljómað skringilega að það auki sjálfsöryggið að hætta eða draga úr notkun Facebook. Enda felst ánægja margra í að birta myndir þar og reyna að fá sem flest viðbrögð, eða „líkar við.“

En hversu raunveruleg er þessi hamingja? Er eitthvað líf svo fullkomið að það innifelur ekkert nema gleðistundir?

Rannsóknir hafa sýnt að þeir sem nota Facebook mikið, eru líklegri til að bera sig saman við annað fólk. Þessi samanburður nær bæði til lífstíls og líkamsvitundar. 

Þá sýna niðurstöður rannsókna að þessi ósjálfráði samanburður veldur oft sambærilegum einkennum og þunglyndi eða depurð. Að líða eins og við séum ekki nóg, dregur úr okkur á öllum sviðum. Líka í vinnunni.

6. Betri svefn

Við vitum að það er æskilegt að hætta allri skjánotkun einum til tveimur tímum fyrir svefn. Margir hafa hins vegar vanið sig á að rétt kíkja á Facebook fyrir svefninn. En áður en við vitum af eru 20, 30, 60 mínútur liðnar!

Að mæta úthvíldur til vinnu alla daga skiptir sköpum. 

Dagsformið okkar er betra og við erum betri í öllu sem við gerum. Hvort heldur sem er í samskiptum, einbeitingu eða að leysa úr verkefnum.

7. Við verðum sterkari félagslega, án Facebook!

Margir eru orðnir svo háðir Facebook að þeir hafa dregið úr beinum félagslegum samskiptum. Svo upptekin erum við á samfélagsmiðlum að við hvorki náum að njóta augnabliksins til fulls né að einbeita okkur að því að eiga í beinum félagslegum samskiptum við fólk.

Að hætta á samfélagsmiðlum, eða draga verulega úr notkun þeirra, styrkir okkur á félagslega sviðinu. Enda nýta sumir samfélagsmiðlana sem ákveðna tækni til að þykjast vera upptekin og fela sjálfsóöryggi.

En að efla okkur á félagslega sviðinu er mjög gott. Ekki aðeins vegna þess að við erum félagsverur að upplagi, heldur sýna margar rannsóknir að okkur líður yfir höfuð betur þegar að við upplifum okkur félagslega sterk. Og það svo sannarlega hjálpar til í vinnu og í starfsframa.

8. Þú lærir að hafa ofan af fyrir sjálfum þér (og það geta það allir!)

Fólk getur mjög auðveldlega varið 60-90 mínútum á dag á Facebook, án þess að upplifa sig sem mikla notendur. Að kíkja aðeins á morgnana, í pásum, í hádeginu, eftir vinnu, á kvöldin…..já, safnast þegar saman kemur.

En hvað myndi þig langa að gera meira af eða öðruvísi?

Fyndist þér það góð tilfinning að vinna verkefnin þín í vinnunni í meiri afslöppun og án þess að vera í kapphlaupi við tímann? Langar þig að tala oftar við samstarfsfélagana. Langar þig að læra núvitund? Finnst þér gaman að púsla á kvöldin eða spila? Finnst þér gaman að lesa? Fara í göngutúr? Eða felst áskorunin í því að þvottakarfan sé ekki alltaf yfirþyrmandi full?

Það skiptir ekki máli í hvað þú velur að nýta tímann en staðreyndin er sú að með því að hætta, eða draga verulega úr notkun samfélagsmiðla, getum við verið að skapa 7-10 klukkustundir á viku sem hægt er að nýta í aðra hluti. 

9. Meiri virkni, meiri hreyfing

Það er allur gangur á því hversu mikið eða lítið við hreyfum okkur við vinnu. En samfélagsmiðlanotkun kallar á kyrrstöðu. Ef notkunin okkar er til dæmis 90 mínútur á dag, þýðir þetta um 10,5 klukkustundir á viku sem við getum tekið ákvörðun um að hreyfa okkur meira eða gera eitthvað öðruvísi en áður.

Þessi aukna virkni getur falist í mörgu. Allt frá því að gefa okkur meiri tíma með börnunum okkar yfir í að taka til á skrifborðinu okkar í lok hvers vinnudags. Oftar en ekki leiðir þessi aukna virkni til þess að við erum yfir vikuna að hreyfa okkur aðeins meira. Því það að gera meira og í betri líðan, skilar sér oft í meiri hreyfingu, þótt það hafi ekki verið markmiðið í sjálfu sér.

10. Aukin sjálfsvitund

Það felst ákveðið frelsi í því að hætta að eltast við endurgjöf frá öðrum á Facebook. Að hætta að fylgjast með því hvað við erum að fá mörg „líkar við,“ flest viðbrögð við færslum eða fylgjast sem best með. 

Þegar að við hættum að eltast við þetta, eykst sjálfsvitundin okkar og við erum líklegri til að læra að njóta augnabliksins.

11. Hæfnin til að taka ákvarðanir eykst

Rannsóknir hafa sýnt að allt að helmingur fólks sem notar Facebook, myndar sér skoðanir byggðar á því sem fólk sér þar. Skoðunin mótast af því sem vinir eða vandamenn eru að segja eða gera.

Sumir mynda sér ekki einu sinni skoðanir á áramótaskaupinu fyrr en það er búið að kíkja á Facebook eða Twitter fyrst. Skrolla yfir skoðanir annarra og segja síðan hvað þeim finnst.

Að hætta á samfélagsmiðlum, eða draga verulega úr notkun þeirra, skilar sér því einnig í því að þú ferð að treysta betur á þínar eigin skoðanir og sannfæringu. Og tekur oftar sjálfstæðar ákvarðanir.

12. Minni neikvæðni

Það er staðreynd að samfélagsmiðlarnir eru vettvangur kvartana og útrásar fyrir óánægju og reiði. Þótt þú takir ekki þátt í því með beinum hætti, er erfitt að smitast ekki af neinu.

Bara það eitt að draga úr notkuninni þannig að hún takmarkist við stuttan tíma á dag, til dæmis hámark 20 mínútur að kveldi, þýðir að neikvæðni annars fólks er ekki að hafa áhrif á þig allan daginn. Sem aftur skilar sér í því að þér líður betur, bæði í vinnu og utan vinnu.

13. Tilfinningagreindin eykst

Eitt af því sem mun skipta enn meira máli á vinnumarkaði framtíðarinnar er tilfinningagreind. Þetta orð fór að skjóta upp kollinum samhliða umræðum um fjórðu iðnbyltinguna og það hvernig stafrænn heimur mun smátt og smátt breyta stórum hluta starfa.

Sterk tilfinningagreind er því góður eiginleiki fyrir starfsframann og einn þeirra eiginleika fólks sem verður eftirsóttari í framtíðinni miðað við það sem nú er.