Klæddu sig í bestu fötin til að virka eldri meðal fræga fólksins

Magnús Geir rifjar upp þá tíma þegar að hann og tvíburabróðir hans Gunnar, voru fyrst að hasla sér völl í heimi kvikmynda- og sjónvarpsefnis. Síðan þá, eru bræðurnir fyrir löngu orðnir þeir stærstu á Independent-markaðinum og hafa fjárfest í mörgum af stærstu myndum kvikmyndasögunnar. Til dæmis Lord of The Rings. 

Í fyrra fjárfestu þeir í íslenskum kvikmyndum: Síðustu veiðiferðinni og Ömmu Hófí. Væntanlegar eru Saumaklúbburinn og framhald á Síðustu veiðiferðinni. 

„Sú mynd mun heita Allra síðasta veiðiferðin og ég hló allan tímann sem ég las handritið,“ segir Gunnar.

Í helgarviðtali Atvinnulífsins heyrum við viðskipta- og rekstrarsögu tvíburanna í Myndform, Gunnars og Magnúsar Geirs Gunnarssona.

Grásleppukarlar

Gunnar og Magnús eru fæddir 2.ágúst árið 1961. Þeir ólust upp á bænum Breiðholti í Garðahverfi á Álftanesi.

Þar býr Gunnar Yngvason faðir þeirra enn, níræður og sprækur segja synirnir. 

Móðir drengjanna, Geirþrúður Eggertína Ársælsdóttir, er látin.

Mamma var hálf þýsk því afi fór til Þýskalands í steinsmiðjunám og kynntist ömmu þar nokkrum árum fyrir síðari heimstyrjöldina. 

Pabbi afa, stofnaði Steinsmiðjuna. Hún var síðan seld og varð hluti af S. Helgason Steinsmiðja,“ 

segir Gunnar en Magnús Geir er einmitt skírður í höfuðið á þessum langafa sínum, sem hét Magnús Geir Guðnason.

Pabbi bræðranna, Gunnar, var grásleppusjómaður og muna bræðurnir æskuna ekki öðruvísi en að hafa verið á grásleppu með pabba sínum.

„Ég fór sjálfur í þá útgerð og keypti bát 18 ára,“ segir Magnús.

„Og ég keypti bát með Högna bróður þegar að ég var 19 ára,“ segir Gunnar.

Magnús er einnig lærður bakarameistari.

„Ég hugsaði með mér að með þau réttindi væri ég öruggur um að geta alltaf stofnað minn eigin rekstur,“ segir Magnús.

En var það svona sterkt í ykkur strax að vilja fara út í eigin rekstur?

„Já,“ svara bræðurnir samróma.

Stofna myndbandaleigur

Árið 1983 ákváðu tvíburabræðurnir að opna myndbandaleigu.

Þá 22 ára.

Fyrsta myndbandaleiga bræðranna hét Myndberg en hún var staðsett á Hótel Esju.

Árið 1984 og 1985 opnuðu þeir myndbandaleiguna Heimamynd og ráku hana á þremur stöðum. Á Langholtsvegi og á tveimur stöðum í Grafarvogi.

„Þetta var algjör bilun. Um jólin voru til dæmis allar myndir leigðar út með tölu,“ segir Magnús.

Það var líka mikið leigt á fimmtudagskvöldum því þá var ekkert sjónvarp fyrr en Stöð 2 var stofnuð,“ 

segir Gunnar og bætir við að það sama hafi gilt um júlímánuð þegar RÚV fór í sumarfrí.

Myndform verður til

Bræðrunum fannst strax mjög mikilvægt að texta sem flestar VHS spólur sem voru til útleigu hjá þeim.

Því á þessum tíma var algengt að myndbandaleigur væru með ótextaðar myndir.

En textunin var dýr.

Árið 1984 stofnuðu þeir Myndform með kollegum sínum, Snorra Hallgrímssyni og Óla Styff.

Þeir ráku líka myndbandaleigu og Snorri hafði unnið á sjónvarpsstöð í Bandaríkjunum í fjögur ár. Hann hafði tækniþekkinguna sem til þurfti og með honum keyptum við tækin til að fara að texta efni sjálfir,“ 

segir Gunnar.

Enn í dag er Snorri þriðjungseigandi að Myndform.

„Enda er hann löngu orðinn eins og einn af fjölskyldunni,“ segja bræðurnir.

Þá fór Myndform að fjölfalda VHS spólur fyrir aðra.

Til að byrja með var Myndform staðsett í sama húsi og Kays vörulistinn sálugi en árið 1995 fluttist Myndform í Trönuhraunið þar sem fyrirtækið er enn staðsett í um 1200 fermetra húsnæði.

„Pétur Kristjánsson lék fyrir dansi þegar að við opnuðum þar,“ segir Gunnar.

Bíóbransinn

Þrátt fyrir ungan aldur fóru bræðurnir fljótt að hasla sér völl á Independent-kvikmyndamarkaðinum. 

Þar sömdu þeir um réttindi mynda til að sýna þær í kvikmyndahúsum, leigja út, selja í verslunum eða selja til sýninga í sjónvarpi.

Independent markaðurinn virkar þannig að kaupendur um allan heim greiða 20% fyrirfram og tryggja þannig framleiðslu kvikmyndanna.

Þetta þýðir að í hartnær fjörtíu ár, hafa tvíburabræðurnir fjárfest í framleiðslu kvikmynda.

Maður þarf svolítið að veðja á það hvaða myndir verða góðar og hverjar ekki,“ 

útskýra bræðurnir.

Vinsælast til útleigu voru myndir sem búið var að sýna í bíó.

Fyrir stærstu myndirnar sem þeir keyptu erlendis, sömdu þeir því stundum við Laugarásbíó um að sýna fyrst myndirnar þar, áður en þær fóru á myndbandaleigurnar eða í sjónvarp.

Árið 1993 tóku þeir síðan við rekstri Laugarásbíós, sem þeir reka enn. 

Þá eru þeir þriðjungseigendur Borgarbíós á Akureyri.

Hvaða myndir fjárfestuð þið í, sem voru fyrstu stóru myndirnar ykkar í Laugarásbíó?

„Dumb and Dumber, Mask og Seven.“ 

Veisluhöld með heimsfrægum stjörnum

Þegar komið er inn á skrifstofu Myndforms er ekki hægt að ímynda sér að margir aðrir Íslendingar hafi hitt jafn margar heimsfrægar stórstjörnur og bræðurnir.

Heilu veggirnir eru prýddar myndum með hverri stórstjörnunni á fætur annarri. Allt frá Michael Jackson yfir í Sean Connery eða frægustu leikstjóra allra tíma.

Enda eru þær ófáar veislurnar þar sem bræðurnir hafa hitt frægt fólk, borðað með þeim kvöldverði, setið kynningarfundi eða spilað með þeim golf.

Stærstu sölusýningar kvikmyndaefnis eru kvikmyndahátíðin í Cannes, American Film Market og nú Berlínarhátíðin.

Þessar sýningar hafa þeir sótt frá árinu 1984.

Talið berst að Lord of The Rings.

„Það vissu allir að annað hvort yrðu þetta risamyndir eða algjört flopp. Tæknin réði varla við þær og aldrei áður hafði þríleikur verið framleiddur strax en verið til sýningar á þremur árum. Við fengum „Take it or leave it tilboð“ og ákváðum að vera með,“ segir Gunnar.

Nokkrum árum síðar sömdu þeir á svipuðum nótum um Hobbitamyndirnar.

Lord of the Rings veislan var reyndar flottasta veisla sem við höfum farið í því í Cannes var búið að byggja upp heilt Hobbitaþorp og í grenndinni var byggður skógur þaðan sem heyrðust drunur og hljóð eins og í myndunum. 

Á svæðinu voru riddararnir á hestum, við drukkum úr krúsum hobbitanna og allt starfsfólkið var klætt sem hobbitar eða aðrir karakterar úr Lord of the Rings“ 

segir Magnús.

Talsetningin vex og dafnar

Að sögn bræðranna hefur tæknin breyst mikið síðustu áratugina og velgengni Myndform ekki síst í því fólgin að starfsemin hefur alltaf verið í sífelldri þróun.

Til dæmis tók fjölföldun DVD við fjölföldun VHS spólanna.

Þá jókst tölvuvinnslan því Myndform sá um að búa til „Menu“ á íslensku og reyndar fyrir myndir Svensk Film líka á Norðurlöndunum.

Lengi hefur Myndform verið með stóra markaðshlutdeild á barnaefni fyrir kvikmyndahús og sjónvarpsstöðvar.

Árið 2011 bættist talsetningin við starfsemi Myndforms.

Eitt verkefnið sem nú er verið að vinna þar, er talsetning á íslenskum sjónvarpsseríum fyrir Baltasar Kormák yfir á ensku.

Netflix vill hreiminn þannig að þeir vilja að íslensku leikararnir döbbi talið á ensku. 

Við höfum alltaf unnið mikið fyrir Baltasar og það leggja fáir jafn mikla áherslu á gæði og hann,“ 

segir Gunnar.

En hér er þó ekki allt upptalið.

Frá árinu 2009 hefur Myndform verið með stóra hlutdeild í sölu borðspila, eða allt frá því að spilið Alias sló fyrst í gegn.

Þá hefur Myndform gefið út einstaka bækur, til dæmis Ævisögu Ladda.

Í dag er einnig verið að selja smoothies drykki, bangsa og fleira.

„Við erum að fara að bæta við orkudrykkjum en í raun snýst þetta um að við erum að nýta betur þá dreifingu sem við erum nú þegar með til verslana,“ segir Magnús.

Í kjallara Myndforms er einnig rekin myndarleg prentsmiðja ásamt bíla- og rúðumerkingum, sem fyrirhugað er að muni stækka í umsvifum á næstu vikum.

Fjölskyldan

Eiginkona Gunnars, Erla Geirsdóttir, er í dag fjármálastjóri Myndforms en byrjaði strax 1983 að vinna á Heimamynd. Börn þeirra eru Geir fæddur 1984, Gunnar fæddur 1993 og Kristín Eva fædd 1997.

Eiginkona Magnúsar er Hafdís Linda Eggertsdóttir. Hún starfar einnig í Myndformi í dag en byrjaði að vinna hjá Heimamynd árið 1986. Börn þeirra eru Eggert Aron fæddur 1990, Telma Dís fædd 1993 og Magnús Geir fæddur árið 2006. Fyrir átti Magnús dótturina Söndru Björk sem er fædd árið 1980.

Bræðurnir viðurkenna að þeir eigi eiginkonum sínum mikið að þakka.

„Við unnum öll kvöld og allar helgar fyrstu tíu árin,“ segir Gunnar og Magnús bætir við: „Og nýttum jólin til að ganga frá uppgjörunum.“

Ég held reyndar að Erla hafi ekkert treyst mér fyrir uppeldinu. Ég gleymdi til dæmis Geir í Kringlunni þegar hann var bara sex ára,“ 

segir Gunnar og hlær.

Magnús kinkar skilningsríkur kolli og segir:

Já þetta gerðist hjá mér líka. Stelpurnar í bíóinu hringdu í mig og spurðu hvort ég hefði ekki gleymt einhverju. Ég sagði nei. 

En þá sögðu þær að ég hefði gleymt Thelmu Dís þar.“

Í dag er sonurinn Geir tekinn við sem framkvæmdastjóri, Sandra Björk er markaðsstjóri, Eggert er yfir prentsmiðjunni og Gunnar yngri starfar hjá Myndform við stefnumótun og hugbúnað.

Þá hefur Sólrún systir bræðranna unnið á skrifstofunni alla sína starfsævi.

En þótt velgengni einkenni sögu bræðranna, hefur fjölskyldan líka þurft að takast á við stór áföll.

Móðir bræðranna lést aðeins 54 ára gömul úr krabbameini. 

Þá lést bróðir þeirra, Ársæll Karl Gunnarsson, 54 ára úr krabbameini. „Hann var mikið í hestunum og leit út eins og Bud Spencer,“ segir Gunnar. 

Árið 1986 var Hildur systir þeirra myrt. 

Þá aðeins 29 ára gömul. 

„Margir muna eftir þessu máli sem Ferjubakkarmálinu,“ segir Gunnar.

Í fyrra reið síðan stórt áfall yfir.

Magnús greindist með sjaldgæft beinmergskrabbamein og varð mjög veikur um tíma. 

Magnús hefur náð undraverðum bata en bræðurnir segja mikilvægt í umræðunni um krabbamein að gefa öðrum fjölskyldum, sem glíma við veikindi ástvina, von og trú.

Því sama hversu erfið veikindi eru, sé mikilvægt að halda í jákvæðnina og baráttuviljann og margt fólk nái góðum bata eins og Magnús.

Gunnar viðurkennir þó að þetta hafi verið erfiður tími. 

Fólk fari í gegnum alls kyns tilfinningar og hugsanir, enda sé það bara mannlegt.

Ég varð eiginlega bara reiður. Mér fannst svo óréttlátt að hann skyldi veikjast en ekki ég. 

Og auðvitað breytir þetta lífsýninni hjá manni. 

Maggi er bara svo duglegur og hraustur og hefur allan tímann verið með rétta hugarfarið. 

Það var þessi styrkleiki hans sem skipti sköpum,“ 

segir Gunnar.

Gamlir karlar á Flórída

Alla tíð hafa bræðurnir verið í ýmsum hliðarverkefnum. 

Til dæmis eiga þeir 12% í Raufarhólshelli í Ölfusi, sem þeir segja mjög skemmtilegu verkefni.

Þá segja þeir velgengnina einnig að þakka frábæru starfsfólki, sem sumt hefur unnið hjá þeim í áraraðir.

Framundan lofa þeir líka stórveislu í kvikmyndahúsum. 

Því vegna Covid frestuðust svo margar frumsýningar.

Meðal stórmynda sem þeir eru með á sinni könnu eru myndir eins og James Bond myndin No Time to Die, Fast and Furious 9, Saumaklúbburinn, Black Widow og Croods 2.

Að sögn bræðranna hefur neysla á kvikmynda- og sjónvarpsefni aldrei verið meiri í heiminum en nú. Og ekkert lát virðist á þeim vexti.

Allt hófst þetta þó á rúntinum.

„Við rúntuðum um allan bæ að leita af hugmyndum um rekstur sem við gætum farið í saman. En við höfum líka alltaf verið varkárir í rekstri“ segir Gunnar. 

Við gátum aldrei hugsað okkur að vinna fyrir aðra. 

Enda skuldum við engum neitt og erum ekki með eitt einasta bankalán,“ 

segir Magnús.

Þeir segjast hvorugir vita hvenær það verður sem þeir sleppa alveg tökum á rekstrinum.

Ef það gerist einhvern tímann.

Draumurinn er þó að á efri árunum dvelji þeir meira langdvölum í húsum sínum á Flórída:

„Og spilum golf!“