„Viðfangsefnið er íslensk fatahönnun, staðan í dag og stefna inn í framtíð“

Til að fagna afhendingu Indriðaverðlaunanna 2020 mun FÍ halda afhendingu og umræðufund í Grósku - Húsi Hugmyndanna í dag klukkan 17.  Í ár stendur félagið á tímamótum á tuttugu ára afmæli og í tilefni afmælis ársins er nokkrum framúrskarandi einstaklingum úr íslenska fatahönnunarsamfélaginu stefnt saman til að taka stöðuna á tuttugu árum af fatahönnun og stefnu hennar til framtíðar.

Vegna samkomutakmarkana verður takmarkaður fjöldi fólks leyfilegur á staðnum og skráning nauðsynleg. Nánari upplýsingar má finna á Facebook-síðu viðburðarins. 

Þátttakendur hringborðsins eru Arnar Már Jónsson fatahönnuður, Bjarney Harðardóttir eigandi 66°Norður, Steinunn Sigurðardóttir fatahönnuður og Eva María Árnadóttir sviðsforseti Listaháskóla Íslands. Yfirskrift umræðunnar er; Hver er framtíðarsýn fatahönnunar, hvar liggja tækifærin og hvert viljum við stefna.

Í framhaldi af verðlaunaafhendingunni mun Steinunn Sigurðardóttir ræða við verðlaunahafann og fara yfir það helsta úr þeirra ferli. 

Aukin fjölbreytni í áherslum og stíl

„Viðfangsefnið er íslensk fatahönnun, staðan í dag og stefna inn í framtíð. Fatahönnunarfélagið á 20 ára afmæli í ár og því viðeigandi að líta aðeins aftur í tímann,“ segir Eva María í samtali við Vísi

„Eitt sem hefur alla tíð haft áhrif á umgjörð íslenskrar fatahönnunar er sú staðreynd að við stödd á eyju, langt frá sérhæfðum framleiðslufyrirtækjum og framleiðsla hér á landi einungis verið í takmörkuðum mæli. Örar tækniframfarir síðustu ára hafa haft gríðarleg áhrif, þar sem tæknin hefur að einhverju leiti fært okkur nær framleiðendunum. Þessi landlægu höft ef svo má segja, eru ekki eins mikil fyrirstaða. Sem dæmi þá þurftu hönnuðir áður fyrr að búa til sniðin í pappír og senda með pósti til framleiðenda, með tilheyrandi fyrirhöfn og útskýringum. Kostnaðarsamt og tímafrekt ferli. Þetta ferli hefur breyst gríðarlega með tækninni og heimurinn hefur minnkað.“

Eva segir að það sé áhugavert að sjá að margir íslenskir hönnuðir velja að framleiða hér á landi og gera fá eintök af hverri flík. Fjölbreytileiki fatahönnunarfyrirtækja hefi aukist mikið, bæði hvað varðar áherslur og stíl.

„Notkun á samfélagsmiðlum og fjölbreyttari leiðir til að kaupa í gegnum netið er eitthvað sem einnig hefur haft gríðarleg áhrif á þennan bransa. Samkeppnin er ekki bara takmörkuð við landið og það sem fæst í búðunum hér, heldur er allur heimurinn undir.“

Indriðaverðlaunin eru heiðursverðlaun Fatahönnunarfélags Íslands, nefnd eftir Indriða Guðmundssyni klæðskera. Með verðlaununum vill Fatahönnunarfélag Íslands veita hönnuðum viðurkenningu fyrir starf sitt og framlag til íslenskrar fatahönnunar og beina ljósi að því besta sem er að gerast í íslenskri fatahönnun hverju sinni. Verðlaunin eiga að auka vitund og virðingu fyrir íslenskri fatahönnun.

FÍ er fagfélag fatahönnuða á Íslandi. Markmið þess er að efla samheldni meðal þeirra sem starfa við fatahönnun á Íslandi og standa vörð um réttindi félagsmanna. Félagið leggur áherslu á að stuðla að öllu því er til framfara horfir í greininni og að efla hugvit innan íslenskrar fatahönnunar. Félagið leggur sig fram við að upplýsa almenning um fatahönnuði og þeirra starfsvettvang.